త్రివిక్రమ్-నితిన్ సినిమా టైటిల్ ఏంటంటే..

అతడు దగ్గర్నుంచి వరుసగా స్టార్ హీరోలతోనే సినిమాలు చేసిన త్రివిక్రమ్ తొలిసారి నితిన్ లాంటి మోడరేట్ హీరోతో సినిమా చేయబోతున్న సంగతి తెలిసిందే. ఈ సినిమాకు ఓ ఆసక్తికర టైటిల్ ఫిక్స్ చేశాడు. అదేంటంటే.. ‘అ.. ఆ’. చాలా చిత్రంగా ఉంది కదా టైటిల్. దీనికి ఓ ట్యాగ్ లైన్ కూడా ఉందండోయ్. అనసూయ రామలింగం వెర్సస్ ఆనంద్ విహారి. ఇవి రెండూ హీరోయిన్, హీరో పేర్లని ప్రత్యేకంగా చెప్పాల్సిన పని లేదు. హీరో, హీరోయిన్ ల మధ్య వైరం, ప్రేమ నేపథ్యంలో ఈ సినిమా సాగుతుందని.. ఇదో రొమాంటిక్ ఎంటర్ టైనర్ అని అర్థమైపోతోంది. ఇప్పటికే స్క్రిప్టు పూర్తి చేసిన త్రివిక్రమ్ ఈ నెలాఖరులో సినిమాను సెట్స్ మీదికి తీసుకెళ్తున్నాడు. కేవలం మూడు నెలల్లోనే సినిమా పూర్తి చేసి.. జనవరి కల్లా సినిమాను రిలీజ్ కు రెడీ చేయాలన్నది త్రివిక్రమ్ ప్లాన్.

‘అ.. ఆ’కి త్రివిక్రమ్ రెగ్యులర్ టెక్నీషియన్స్ ఎవరూ పని చేయడం లేదు. తమిళ యంగ్ టర్క్ అనిరుధ్ రవిచందర్ మ్యూజిక్ అందిస్తుండగా.. ప్రఖ్యాత సినిమాటోగ్రాఫర్ రాజీవ్ మీనన్ ఛాయాగ్రహణం అందించబోతుండటం విశేషం. త్రివిక్రమ్ మాతృ సంస్థ అనదగ్గ హారిక అండ్ హాసిని క్రియేషన్స్ ఈ సినిమాను నిర్మిస్తుంది. మలయాళ బ్లాక్ బస్టర్ ‘ప్రేమమ్’తో హీరోయిన్ గా పరిచయమైన అనుపమ పరమేశ్వర్ ఇందులో ఓ కీలక పాత్ర చేయబోతోంది. త్రివిక్రమ్ గత సినిమాల టైటిళ్లు కొంచెం ఆర్డినరీగా ఉన్నాయన్న అభిప్రాయాలు వినిపించాయి. ఐతే తన కొత్త సినిమాకు కొంచెం డిఫరెంట్ టైటిల్ పెట్టి ఆసక్తి రేపాడు త్రివిక్రమ్. సినిమా కూడా అంతే ఆసక్తికరంగా ఉంటుందేమో చూడాలి. సన్నాఫ్ సత్యమూర్తి ఆశించిన స్థాయిలో ఆడని నేపథ్యంలో త్రివిక్రమ్ చాలా కసితో ఈ సినిమా చేస్తున్నాడు.