సెల్ఫ్ ప్రమోషన్ మొదలెట్టిన గురూజీ!

సినీ పరిశ్రమలో దర్శకులు చాలామందే ఉంటారు కానీ తమకంటూ ఒక బ్రాండ్.. ఫ్యాన్ ఫాలోయింగ్ తెచ్చుకునేవారు మాత్రం కొందరే. అలాంటివారిలో త్రివిక్రమ్ శ్రీనివాస్ కూడా ఒకరు. మాటల మాంత్రికుడు.. గురూజీ లాంటి బిరుదులు కూడా ఆయనకే ఉన్నాయి. ఆయన దర్శకత్వంలో స్టైలిష్ స్టార్ అల్లు అర్జున్ హీరోగా తెరకెక్కిన 'అల వైకుంఠపురములో' ఈ సంక్రాంతికి విడుదలైంది. పాజిటివ్ టాక్ తో బాక్స్ ఆఫీస్ దగ్గర దూసుకుపోతోంది. దీంతో 'అల వైకుంఠపురములో' టీమ్ సంతోషంగా ఉంది.

సహజంగా ఇలా సినిమా సూపర్ హిట్ టాక్ తెచ్చుకున్నప్పుడు ఫిలిం యూనిట్ వారు లేదా హీరో స్పెషల్ పోస్టర్ రిలీజ్ చేసి ప్రేక్షకులకు కృతజ్ఞతలు తెలుపుతారు. అయితే ఈసారి 'అల వైకుంఠపురములో' టీమ్ ఏకంగా త్రివిక్రమ్ థ్యాంక్ యూ చెప్తున్నట్టుగా ఒక కొత్త పోస్టర్ రిలీజ్ చేసింది. ఈ పోస్టర్ లో గురూజీ ఓ రాజకీయనాయకుడి తరహాలో రెండు చేతులు జోడించి ప్రేక్షకదేవుళ్లకు నమస్కారం పెడుతూ ఉన్నారు. పోస్టర్ పై 'థ్యాంక్ యూ ఆల్' అని క్యాప్షన్ ఉంది. ఇందులోనే ప్రేక్షకులకు భోగి శుభాకాంక్షలు కూడా తెలిపారు. అంతా బాగానే ఉంది కానీ ఈ పోస్టర్ పై అప్పుడే సోషల్ మీడియాలో సెటైర్లు కూడా పడుతున్నాయి.

త్రివిక్రమ్ సెల్ఫ్ ప్రమోషన్ చేసుకుంటున్నారని.. స్టార్ హీరోల లాగా పోస్టర్లతో ప్రచారం మొదలు పెట్టారని విమర్శిస్తున్నారు. హీరోలకు ప్రచారం అనేది చాలా అవసరం. ఎప్పుడూ లైమ్ లైట్ లోనే ఉండాలి. అందుకే అయినదానికి కానిదానికి ఏదో ఒక పోస్టర్ వేసి సోషల్ మీడియాలో ఊదరగొడుతూ ఉంటారు. కానీ దర్శకులకు అలాంటి ప్రచారం అవసరం ఉండదు. అయినా ఈ పోస్టర్ చూస్తుంటే మాత్రం త్రివిక్రమ్ సెల్ఫ్ ప్రమోషన్ మొదలు పెట్టారనే అంటున్నారు. మరి ఈ సెల్ఫ్ ప్రమోషన్ ఈ పోస్టర్ తోనే ఆగుతుందా లేక భవిష్యత్తులో కూడా కొనసాగుతుందా అనేది వేచి చూడాలి.