ఈ మార్పు మంచిదే...

ప‌వ‌ర్ ఫుల్ అత్త‌పాత్ర‌లు... అక్క పాత్ర‌లు... అమ్మ పాత్ర‌లు... ఇలా సినిమాలో న‌ట‌న‌కు ఆస్కార‌మున్న‌... కీల‌క‌మైన పాత్ర‌ల‌న‌గానే... ప‌క్క రాష్ట్రాల నుంచి న‌టీమ‌ణుల‌ను తీసుకొస్తున్నారు మ‌న ద‌ర్శ‌క నిర్మాత‌లు. న‌దియా.. ఖుష్బూ... వీళ్లంతా అలా వ‌చ్చిన‌వాళ్లే క‌దా. ఇప్పుడు వీరిని ప‌క్క‌న‌పెట్టి మ‌న తెలుగున‌టిని తిరిగి తెర‌మీద‌కు తెచ్చే ప్ర‌య‌త్నం జ‌రుగుతోంది.

ల‌య స్వ‌యం వ‌రం సినిమాతో హీరోయిన్‌ గా ప‌రిచ‌యం అయ్యింది. ఆ త‌రువాత ఎన్నో మంచి సినిమాలు చేసిందీ అచ్చ‌తెలుగందం. హ‌ఠాత్తుగా ఓ రోజు త‌ల్లిదండ్రులు చూసిన పిల్లాడిని పెళ్లాడి అమెరికా వెళ్లిపోయింది. ఇద్ద‌రు పిల్ల‌ల‌తో సంతోషంగా ఉంది. సినిమాల వైపు మ‌ళ్లీ చూడ‌లేదు. ఇదిగో ఇప్పుడు ఆమె చేత సెకండ్ ఇన్నింగ్స్ ప్రారంభించేలా చేయ‌డానికి త‌ప‌న ప‌డుతున్నాడు త్రివిక్ర‌మ్‌. అత‌ను జూనియ‌ర్ ఎన్టీఆర్‌ తో త్వ‌ర‌లో తీయ‌బోయే సినిమాలో ఆమెను ఓ కీల‌క పాత్ర చూపించ‌నున్నాడ‌ట‌. అంతే కాదు ఇప్ప‌టికే ల‌య‌తో చర్చించ‌డం... ఆమె ఒప్పుకోవ‌డం కూడా జ‌రిగిపోయింద‌ని తెలుస్తోంది. రెమ్యున‌రేష‌న్ కూడా ఆమె కోరిన విధంగా ఇవ్వ‌డానికి నిర్మాత కూడా ఒప్పుకున్నాడ‌ట‌. అదే నిజ‌మైన మన తెలుగమ్మాయి సెకండ్ ఇన్నింగ్స్‌కు స‌ర్వం సిద్ధం అయిన‌ట్టే.

అస‌లే అజ్ఞాత‌వాసి లాంటి డిజాస్ట‌ర్ నుంచి త్రివిక్ర‌మ్ బ‌య‌టికి రావాలంటే మ‌రో భారీ హిట్ అవ‌స‌రం. జూనియ‌ర్ ఎన్టీఆర్ సినిమాతోనే ఆ హిట్ కొట్టాల‌న్నా ప‌ట్టుద‌ల‌తో ఉన్నాడు త్రివిక్ర‌మ్‌. అందుకే మంచి తారాగ‌ణం సినిమాలో ఉండేట్టు చూసుకుంటున్నాడు. అందుకే తానే ప‌ట్టుబ‌ట్టి ల‌య‌ను ఒప్పించాడ‌ట‌. ల‌య చాలా నేచుర‌ల్‌ గా న‌టిస్తుంది. కాబ‌ట్టి పాత్ర ఎలాంటిదైనా ఆమె ఇర‌గ‌దీయ‌డం ఖాయం.