ప‌వ‌న్ చిత్రం త‌ర్వాతే ఎన్టీఆర్‌ తో

ఎప్ప‌ట్నుంచో ఊరిస్తున్న కాంబినేష‌న్ ఎట్ట‌కేల‌కి సెట్ట‌యింది. త్రివిక్ర‌మ్ ద‌ర్శ‌క‌త్వంలో ఎన్టీఆర్ న‌టించ‌బోతున్నారు. ఈ యేడాది సెప్టెంబ‌రు నుంచి చిత్రీక‌ర‌ణ మొద‌లుపెడ‌తారు. హారిక అండ్ హాసిని క్రియేష‌న్స్ సంస్థ నిర్మించ‌బోతోంది. త్రివిక్ర‌మ్ ద‌ర్శ‌క‌త్వంలో ఎన్టీఆర్ అనే ప్ర‌క‌ట‌న వెలువ‌డేస‌రికి ఇండ‌స్ట్రీ ఒక్క‌సారిగా షాక్ తింది. త్రివిక్ర‌మ్ ఇంకా ప‌వ‌న్ సినిమానే ప‌ట్టాలెక్కించ‌లేదు, అప్పుడే ఆయ‌న్నుంచి కొత్త సినిమా ప్ర‌క‌ట‌న వెలువ‌డ‌డ‌మేట‌ని ఆశ్చ‌ర్య‌పోయారంతా. కొంప‌దీసి త్రివిక్ర‌మ్‌ - ప‌వ‌న్ కాంబోలో చిత్రం అటకెక్కిందా ఏంటని అనుమాన‌ప‌డ్డారు. కానీ హారిక అండ్ హాసిని సంస్థ విడుద‌ల చేసిన ఆ ప్ర‌క‌ట‌న‌లోనే ప‌వ‌న్ చిత్రం త‌ర్వాతే ఎన్టీఆర్‌తో అని స్ప‌ష్టంగా పేర్కొనడం చూసి అంతా ఊపిరి పీల్చుకొన్నారు.

మామూలుగా త్రివిక్ర‌మ్ ఒక సినిమాని పూర్తి చేశాక‌, మ‌రో సినిమాని ప‌ట్టాలెక్కించడానికి చాలా స‌మ‌యం తీసుకుంటుంటారు. ఒక్కోసారి ఒకో యేడాది చొప్పున గ్యాప్ వ‌స్తుంటుంది. నేను ఇంత‌కంటే వేగంగా తీయ‌లేన‌ని కూడా చెబుతుంటారాయ‌న‌. కానీ ఈసారి మాత్రం రూటు మార్చి వెంట వెంట‌నే సినిమాలు ప్ర‌క‌టిస్తూ వ‌స్తున్నాడు. కొంత‌కాలం కింద‌టే ప‌వ‌న్‌తో సినిమాకి కొబ్బ‌రికాయ కొట్టేశాడు. ప‌వ‌న్ ప్ర‌స్తుతం `కాట‌మ‌రాయుడు`తో బిజీగా ఉండ‌టంతో త్రివిక్ర‌మ్ వెయిట్ చేస్తున్నాడు. ఆ చిత్రం చివ‌రి ద‌శ‌కు రాగానే రంగంలోకి దిగేందుకు స‌ర్వం సిద్ధం చేసుకొన్నారు. అయితే ఇదివ‌ర‌క‌టిలా ఆచితూచి కాకుండా, ఈసారి వేగంగా సినిమాని పూర్తి చేయాల‌ని నిర్ణ‌యించుకొన్నారు త్రివిక్ర‌మ్‌. అందుకే సెప్టెంబ‌రులో ఎన్టీఆర్‌తో సినిమా ముందుగానే ప్ర‌క‌టించేశాడు. మొత్తంగా త్రివిక్ర‌మ్ కూడా గేరు మార్చి వేగం పెంచుతున్నాడ‌న్న విష‌యం స్ప‌ష్టంగా అర్థ‌మ‌వుతోంది.