త్రివిక్రమ్ అడిగితే.. రాజశేఖర్ చేసేవాడట

కొన్ని నెలల కిందటే విడుదలైన ‘నేనే రాజు నేనే మంత్రి’ సినిమాకు దర్శకుడు తేజ ముందు అనుకున్న హీరో రాజశేఖర్. కానీ ఆ సినిమా క్లైమాక్స్ విషయంలో అభిప్రాయ భేదాల వల్ల తాను అందులో నటించలేదని రాజశేఖరే స్వయంగా చెప్పాడు. ఇది కాకుండా గత కొన్నేళ్లలో తాను చాలా సినిమాలు మిస్సయినట్లు రాజశేఖర్ చెప్పాడు. రామ్ చరణ్ ‘ధృవ’ కూడా తాను మిస్ చేసుకున్న సినిమాల్లో ఒకటన్నట్లుగా ఇంతకుముందు రాజశేఖర్ చెప్పాడు. అలాగే త్రివిక్రమ్ శ్రీనివాస్ దర్శకత్వంలో తెరకెక్కిన ‘సన్నాఫ్ సత్యమూర్తి’లో ఉపేంద్ర చేసిన పాత్రకు కూడా తనను అనుకున్నట్లుగా తనకు తెలిసిందని రాజశేఖర్ తెలిపాడు.

ఐతే త్రివిక్రమ్ కానీ.. ఇంకెవరు కానీ ఆ సినిమా విషయమై తనను సంప్రదించలేదని రాజశేఖర్ చెప్పాడు. త్రివిక్రమ్ తనను అడిగి ఉంటే మాత్రం ఆ సినిమా తప్పకుండా చేసేవాడినని రాజశేఖర్ వెల్లడించాడు. మరోవైపు ‘సీతమ్మ వాకిట్లో సిరిమల్లె చెట్టు’ సినిమాలో విక్టరీ వెంకటేష్ చేసిన పాత్రకు మొదట తననే అనుకున్నట్లు రాజశేఖర్ చెప్పడం విశేషం. తనుకు ఆ సినిమా లైన్ కూడా చెప్పారని.. ఐతే అది కొన్ని కారణాల వల్ల వర్కవుట్ కాలేదని రాజశేఖర్ చెప్పాడు. ఐతే చాలా ఏళ్ల పాటు లైమ్ లైట్లో లేకుండా ఉన్న రాజశేఖర్.. మహేష్ బాబుకు అన్నయ్యగా నటించి ఉంటే ఈ సినిమా ఎలా ఉండేదో అన్న ఊహే చాలా ఆశ్చర్యం కలిగిస్తుందని చెప్పాలి.