గురూజీ వల్ల కాలేదు..ఇక రాజమౌళి వల్లే అవుతుందా?

కమెడియన్ గా సునీల్ టాలీవుడ్ ను చాలా రోజులు ఏలడం.. ఆ తర్వాత హీరోగా మారడం అందరికీ తెలిసిందే. అయితే హీరోగా మొదట్లో కొన్ని విజయాలు దక్కినా తర్వాత మాత్రం అపజయాలు ఎదుర్కోవలసి వచ్చింది. ఇక లాభం లేదు అనుకొని కమెడియన్ గా రీ ఎంట్రీ ఇచ్చాడు సునీల్. రీ ఎంట్రీ అయితే ఇచ్చాడు కానీ సునీల్ కు బ్రేక్ మాత్రం అందని దాక్ష్రలాగా తయారైంది.

రీ ఎంట్రీ తర్వాత ఓ అరడజను సినిమాలు చేస్తే ఒక్కటి కూడా క్లిక్ కాలేదు. దీంతో సునీల్ కు బ్రేక్ ఇవ్వడం ఆయన ఆప్త మిత్రుడు త్రివిక్రమ్ శ్రీనివాస్ వల్లే సాధ్యం అవుతుందని చాలామంది అన్నారు. త్రివిక్రమ్ దర్శకత్వంలో తెరకెక్కిన 'అరవింద సమేత' లో సునీల్ కోసం ఒక కీలక పాత్ర డిజైన్ చేసినప్పటికీ దానికి పెద్దగా రెస్పాన్స్ దక్కలేదు. సరే.. ఆ సినిమా కొంచెం సీరియస్ గా సాగే కథ కాబట్టి మరో సినిమాలో త్రివిక్రమ్ తప్పనిసరిగా సునీల్ కు బ్రేక్ ఇస్తారని అనుకున్నారు. ఈ సంక్రాంతికి రిలీజ్ అయిన 'అల వైకుంఠపురములో' లో సునీల్ కమెడియన్ గా నటించినా పెద్దగా గుర్తు పెట్టుకోదగ్గ పాత్ర అయితే కాదు. సినిమాలో ఉన్న ఎన్నో పాత్రలలో ఆదో పాత్ర అంతే. ఈ సినిమా ఎంత పెద్ద హిట్ అయినా సరే సునీల్ కు పెద్దగా ఒరిగేది కూడా ఏమీ లేదు.

దీంతో త్రివిక్రమ్ కూడా సునీల్ కు బ్రేక్ ఇవ్వలేకపోయారని.. సునీల్ కు ఇప్పట్లో బ్రేక్ దక్కేలా లేదనే కామెంట్లు వినిపిస్తున్నాయి. కొందరైతే సునిల్ కు బ్రేక్ ఇవ్వాలంటే ఏకంగా రాజమౌళి రావాల్సిందేనని అంటున్నారు. రాజమౌళి గతంలో సునీల్ హీరోగా 'మర్యాద రామన్న' అనే సూపర్ హిట్ సినిమాను తెరకెక్కించారు. ఇప్పుడు కూడా మరోసారి రాజమౌళి అలాంటిదేమైనా ప్లాన్ చెయ్యాలేమో!