త్రివిక్రమ్ తో సినిమా..సునీల్ ఇంట్రెస్టింగ్ కామెంట్స్

కమెడియన్ టర్న్డ్ హీరో సునీల్.. రైటర్ టర్న్డ్ డైరెక్టర్ త్రివిక్రమ్.. ఆప్త మిత్రులన్న సంగతి తెలిసిందే. సినిమా అవకాశాల కోసం ఇద్దరూ భీమవరం నుంచి వచ్చిన హైదరాబాద్ లోని పంజాగుట్టలో ఒక గదిలో ఉంటూ అక్కడి నుంచే ప్రయత్నాలు సాగించారు. కొంచెం అటు ఇటుగా ఇద్దరూ ఒకేసారి సినిమాల్లోకి అడుగు పెట్టారు. ఆపై ఎవరికి వారు మంచి స్థాయికి వెళ్లారు. సునీల్ కు మాత్రం ఉన్నట్లుండి బ్రేక్ పడింది. కమెడియన్ పాత్రలు వదిలేసి హీరో వేషాలకు మళ్లిన మొదట్లో బాగానే ఉన్నా.. ఆ తర్వాత వరుసగా ఫెయిల్యూర్లు ఎదుర్కొన్నాడు. ఇప్పుడు చాలా ఇబ్బందికర పరిస్థితికి చేరుకున్నాడు. మరోవైపు త్రివిక్రమ్ మాత్రం ఎక్కడికో వెళ్లిపోయాడు.

ఇప్పుడు సునీల్ ఉన్న పరిస్థితుల నుంచి అతడిని బయటపడేసి మళ్లీ అతడికి సక్సెస్ అందించగల సత్తా త్రివిక్రమ్ కే ఉందన్నది చాలామంది అభిప్రాయం. ఇదే విషయమై సునీల్ దగ్గర ప్రస్తావిస్తే.. తనకూ త్రివిక్రమ్ తో సినిమా చేయాలనే ఉందని అన్నాడు. కాకపోతే తన మిత్రుడు ఇప్పుడు పెద్ద పెద్ద సినిమాలు చేస్తున్నాడని.. అందుకే తనతో సినిమా ప్లాన్ చేయలేకపోతున్నాడని సునీల్ చెప్పాడు. ఐతే త్రివిక్రమ్ తో తన సినిమా ఎంత లేటైతే అంత మంచిదని.. అప్పుడు అతడి మార్కెట్ ఇంకా పెరుగుతుందని సునీల్ చెప్పడం విశేషం. త్రివిక్రమ్ తనతో సినిమా చేస్తే ఒక్క దెబ్బతో తనను పైకి లేపేస్తాడని అన్నాడు. రెండు మూడేళ్ల తర్వాత అయినా త్రివిక్రమ్ తో తాను సినిమా చేయడం మాత్రం గ్యారెంటీ అని సునీల్ చెప్పాడు. ‘మన్మథుడు’లో భలేగా క్లిక్కయిన బంకు శీను పాత్ర నేపథ్యంలో ఒక సినిమా చేయాలని తమ మధ్య చర్చ జరిగిందని.. అది కుదరలేదని.. తనకు నప్పే పాత్ర.. కాన్సెప్ట్ త్రివిక్రమ్ మనసులో తడితే కచ్చితంగా తనతో సినిమా చేస్తాడని సునీల్ ధీమా వ్యక్తం చేశాడు.