టీవీ సిరీస్‌ లో నటించాలంటే డేటింగ్ చేయ‌కూడ‌ద‌ట‌

సినిమా అయినా.. సీరియ‌ల్ అయినా.. ఇంకేదైనా షో అయినా.. అందులో చేయ‌బోయే ఆర్టిస్టులు.. టెక్నీషియ‌న్ల‌తో అగ్రిమెంట్లు చేసుకోవ‌డం మామూలే. పారితోష‌కం ద‌గ్గ‌ర్నుంచి అందులో అనేక విష‌యాల‌కు సంబంధించిన క్లాజులుంటాయి. అన్నీ చ‌దువుకున్నాకే సంత‌కం పెడ‌తారు ఎవ‌రైనా. ఐతే ఓ హిందీ టీవీ సిరీస్‌ నిర్మాత‌లు మాత్రం ఇంత‌కుముందెన్న‌డూ చూడ‌ని విచిత్ర‌మైన ష‌ర‌తు విధించారు. త‌మ‌ టీవీ సిరీస్‌ లో చేయాల‌ని ఆశ‌ప‌డేవాళ్లు.. ఈ షో న‌డిచినంత కాలం ఎవ‌రితోనూ డేటింగ్ చేయ‌బోమ‌ని.. సింగిల్ గానే ఉంటామ‌ని పేర్కొంటూ అగ్ర‌మెంట్ మీద సంత‌కం చేయాల‌ని ష‌ర‌తు విధించారు.

రిష్టన్ కా సౌదాగర్- బాజీగర్ అనే టీవీ సిరీస్ కోసం పెట్టిన ష‌ర‌తు ఇది. ఇందులో ప్ర‌ధాన పాత్ర‌లకు ఎంపికైన వత్సల్ సేథ్.. ఇషితా దత్తా నిర్మాత‌లు కోరిన‌ట్లే 'నో డేటింగ్' క్లాజ్ కు అంగీక‌రిస్తూ ఒప్పంద పత్రాల పై సంతకాలు చేశారు. ఈ సీరియల్ త్వరలోనే ప్రసారం కానుంది. ఐతే ఇలా 'నో డేటింగ్' క్లాజ్ చేర్చడాన్ని ముందు చాలామంది న‌టీన‌టులు వ్య‌తిరేకించార‌ట‌. ఇది వ్యక్తిగత స్వేచ్ఛకు భంగమని.. ఈ ష‌ర‌తుకు ఒప్పుకుని ఇందులో న‌టించ‌లేమ‌ని చెప్పేసి వెళ్లిపోయార‌ట. అయినా నిర్మాత‌లు మ‌న‌సు మార్చుకోలేద‌ట‌. త‌మ ష‌రతుకు అంగీక‌రించిన వ‌త్స‌ల్.. ఇషికాల‌కే ఛాన్సిచ్చారు. వాళ్ల‌తోనే షూటింగ్ చేశారు.