మెగా హీరో థ‌ర్డ్ వెంచ‌ర్‌కి టైటిల్ రెడీ

మెగా మేన‌ల్లుడు యంగ్ హీరో పంజా వైష్ణ‌వ్ తేజ్ `ఉప్పెన‌` మూవీతో హీరోగా ఎంట్రీ ఇచ్చిన విష‌యం తెలిసిందే. స్టార్ డైరెక్ట‌ర్ సుకుమార్ శిష్యుడు బుచ్చిబాబు సానాని డైరెక్ట‌ర్ గా ప‌రిచ‌యం చేస్తూ మైత్రీ మూవీ మేక‌ర్స్ తో క‌లిసి సుకుమార్ రైటింగ్స్ నిర్మించిన ఈ మూవీ బాక్సాఫీస్ వ‌ద్ద బారీ వ‌సూళ్ల‌ని సాధించ‌డ‌మే కాకుండా బ్లాక్ బ‌స్ట‌ర్ హిట్ గా నిలిచి డెబ్యూ మూవీల్లో స‌రికొత్త రికార్డుని సొంతం చేసుకుంది.

హీరోగా పంజా వైష్ణ‌వ్ తేజ్ కు మంచి గుర్తింపుని తెచ్చిపెట్టింది. ఈ మూవీ త‌రువాత క్రిష్ తెర‌కెక్కించిన `కొండ పొలం` చేసినా ఈ మూవీ ఆశించిన స్థాయిలో ఆక‌ట్టుకోలేక‌పోయింది. ఫేమ‌స్ న‌వ‌ల ఆధారంగా చేసిన ఈ మూవీ క‌మ‌ర్షియ‌ల్ గా ప్ర‌భావాన్ని చూపించ‌లేక‌పోయింది. దీంతో ఇప్పుడు అంద‌రి చూపు పంజా వైష్ణ‌వ్ తేజ్ థ‌ర్డ్ వెంచ‌ర్ పై ప‌డింది.

పంజా వైష్ణ‌వ్ తేజ్ థ‌ర్డ్ ఫిల్మ్ ని శ్రీ వెంక‌టేశ్వ‌ర సినీ చిత్ర ఎల్ ఎల్ పీ బ్యాన‌ర్ పై స్టార్ ప్రొడ్యూస‌ర్ బీవీఎస్ ఎన్ ప్ర‌సాద్ నిర్మిస్తున్నారు. ఈ మూవీ ద్వారా `అర్జున్ రెడ్డి` త‌మిళ్ రీమేక్ `ఆదిత్య వ‌ర్మ‌` డైరెక్ట‌ర్ గిరీషాయ తెలుగు తెర‌కు ప‌రిచ‌యం అవుతున్నారు. ఈ మూవీకి సంబంధించిన ఆస‌క్తిక‌ర‌మైన అప్ డేట్ ని, ఫ‌స్ట్ లుక్ ని హీరో పంజా వైష్ణ‌వ్ తేజ్ పుట్టిన రోజు సంద‌ర్భంగా జ‌న‌వ‌రి 13న మేక‌ర్స్ రిలీజ్ చేయ‌బోతున్నారు.

ఈ చిత్రానికి సంబంధించిన మ‌రో ఆస‌క్తిక‌ర‌మైన విష‌యం తాజాగా బ‌య‌టికి వ‌చ్చింది. ఈ చిత్రానికి టైటిల్ ని కూడా ప్ర‌క‌టించ‌బోతున్న‌ట్టుగా తెలుస్తోంది. అయితే ఈ మూవీ కోసం రెండు టైటిల్స్ ని మేక‌ర్స్ ప‌రిశీలిస్తున్నారు. అందులో ఒక‌టి `రంగ రంగ వైభవంగ‌` కాగా మ‌రొక‌టి `ఆబాల గోపాలం`. ఈ రెండు టైటిల్స్ లో `రంగ రంగ వైభవంగ‌` టైటిల్‌నే ఫైన‌ల్ చేయాల‌ని మేక‌ర్స్ భావిస్తున్నార‌ట‌.

ఫ్యామిలీ ల‌వ్ ఎంట‌ర్ టైన‌ర్ గా రూపొందుతున్న ఈ మూవీలో హీరో పంజా వైష్ణ‌వ్ తేజ్ కు జోడీగా `రొమాంటిక్‌` మూవీ ఫేమ్ కేతిక‌శ‌ర్మ న‌టిస్తోంది. బాపినీడు స‌మ‌ర్పిస్తున్న ఈ మూవీకి శ్యామ్ ద‌త్ సినిమాటోగ్రాఫ‌ర్ గా వ‌ర్క్ చేస్తున్నారు.