స్పీడు పెంచిన మెగా అల్లుళ్లు!

మెగా ఫ్యామిలీ నుంచి ఇప్ప‌టి వ‌ర‌కు చాలా మంది హీరోలు తెరంగేట్రం చేశారు. రామ్ చ‌ర‌ణ్ నుంచి పంజా వైష్ణ‌వ్ తేజ్ వ‌ర‌కు దాదాపు ఓ ప‌ది మంది హీరోల వ‌ర‌కు మెగా ఫ్యామిలీ నుంచి హీరోలుగా ఎంట్రీ ఇచ్చారు. ఇందులో ఇప్ప‌టికే చాలా మంది స్టార్ డ‌మ్ ని సొంతం చేసుకుని స్టార్ లుగా టాలీవుడ్ లో ఓ వెలుగు వెలుగుతున్నారు. కొత్త‌గా కొంత మంది స్టార్స్ స్టార్ డ‌మ్ కోసం ప్ర‌య‌త్నాలు చేస్తున్నారు. ఈ రేసులో ఇద్ద‌రు మెగా ఫ్యామిలీ బ్ర‌ద‌ర్స్ తాజాగా స్పీడు పెంచేశారు.

వాళ్లే సాయి ధ‌ర‌మ్ తేజ్‌, పంజా వైష్ణ‌వ్ తేజ్‌. 'రిప‌బ్లిక్' మూవీ రిలీజ్ కు ముందు హీరో సాయి ధ‌ర‌మ్ తేజ్ బైక్ యాక్సిడెంట్ కు గురైన విష‌యం తెలిసిందే. ఆ త‌రువాత ట్రీట్ మెంట్ కోసం నెల పాటు హాస్పిట‌ల్ లోనే గ‌డిపిన సాయి ధ‌ర‌మ్ తేజ్ ఆ త‌రువాత ఆరు నెల‌ల పాటు ఇంటి ప‌ట్టునే వుంటూ విశ్రాంతి తీసుకున్నారు. ఇటీవ‌లే త‌న కొత్త సినిమా షూటింగ్ లో పాల్గొని రాకెట్ వేగంతో షూటింగ్ ని ప‌రుగులుపెట్టిస్తున్నారు.

కార్తీక్ దండు ద‌ర్శ‌క‌త్వంలో ఎస్ వీసీ సినిమా, సుకుమార్ రైటింగ్స్ బ్యాన‌ర్ ల‌పై బీవీఎస్ ఎన్ ప్ర‌సాద్‌, స్టార్ డైరెక్ట‌ర్ సుకుమార్ సంయుక్తంగా ఈ మూవీని నిర్మిస్తున్నారు. స‌స్పెన్స్ థ్రిల్ల‌ర్ ఎంట‌ర్ టైన‌ర్ గా రూపొందుతున్న ఈ మూవీ ప్ర‌స్తుతం చిత్రీక‌ర‌ణ ద‌శ‌లో వుంది. ఇదిలా వుంటే ఈ మూవీతో పాటు త్వ‌ర‌లో మ‌రో సినిమాకు సాయి ధ‌ర‌మ్ తేజ్ గ్రీన్ సిగ్న‌ల్ ఇచ్చేశారు. త‌మిళ హిట్ ఫిల్మ్ 'వినోదాయ సితం' ఆధారంగా సముద్ర‌ఖ‌ని డైరెక్ష‌న్ లో ప‌వ‌న్ న‌టించ‌నున్న ఈ మూవీలో సాయి ధ‌ర‌మ్ తేజ్ ఓ కీల‌క పాత్ర‌లో న‌టించ‌బోతున్నాడు.

త్రివిక్ర‌మ్ మాట‌లు, స్క్రీన్ ప్లే అందిస్తుండ‌గా జీ మీడియాతో క‌లిసి పీపుల్స్ మీడియా ఫ్యాక్ట‌రీ, ప‌వ‌న్ క‌ల్యాణ్ క్రియేటివ్ మీడియా వ‌ర్క్స్ సంయుక్తంగా నిర్మించ‌బోతున్నాయి. దీనికి సంబంధించిన మ‌రిన్ని వివ‌రాలు త్వ‌ర‌లోనే బ‌య‌టికి రానున్నాయి. ఇలా సాయి ధ‌ర‌మ్ తేజ్ క్రేజీ లైన‌ప్ తో స్పీడు పెంచేస్తుంటే సోద‌రుడు పంజా వైష్ణ‌వ్ తేజ్ కూడా స్పీడు పెంచేశాడు. ఇప్ప‌టికే 'రంగ రంగ వైభ‌వంగ‌' షూటింగ్ ని పూర్తి చేసి మ‌రో మూవీకి రెడీ అయిపోయాడు.

సితార ఎంటర్ టైన్ మెంట్స్‌, ఫార్చూన్ ఫోర్ సినిమాస్ బ్యాన‌ర్ ల‌పై శ్రీ‌కాంత్ రెడ్డిని ద‌ర్శ‌కుడిగా ప‌రిచ‌యం చేస్తూ సూర్య దేవ‌ర నాగ‌వంశీ, స్టార్ డైరెక్ట‌ర్ త్రివిక్ర‌మ్ వైఫ్ సాయి సౌజ‌న్య ఓ భారీ యాక్ష‌న్ ఎంట‌ర్ టైన‌ర్ ని నిర్మిస్తున్నారు. హై వోల్టేజ్ మాస్ మ‌సాలా యాక్ష‌న్ ఎంట‌ర్ టైన‌ర్ గా రూపొందుతున్న ఈ మూవీ ఫ‌స్ట్ లుక్ డైలాగ్ మోష‌న్ పోస్ట‌ర్ ని బుధ‌వారం విడుద‌ల చేశారు. ఇదే రోజు ఈ మూవీని లాంఛ‌నంగా పూజా కార్య‌క్ర‌మాల‌తో ప్రారంభించారు. 'పెళ్లిసంద‌D' ఫేమ్ శ్రీ‌లీలా హీరోయిన్ గా న‌టిస్తోంది.

వైష్ణ‌వ్ తేజ్‌, శ్రీ‌లీల పై చిత్రీక‌రించిన ముహూర్త‌పు స‌న్నివేశానికి సాయి ధ‌ర‌మ్ తేజ్ క్లాప్ నిచ్చారు. ఈ మూవీ డైలాగ్ మోష‌న్ పోస్ట‌ర్ అంచ‌నాల్ని పెంచేస్తోంది. ఈ మూవీతో వైష్ణ‌వ్ తేజ్ కు మాస్ ఇమేజ్ రావ‌డం ఖాయం అని అంటున్నారు. ఇలా ఇద్ద‌రు బ్ర‌ద‌ర్స్ బ్యాక్ టు బ్యాక్ సినిమాల‌తో స్పీడు పెంచ‌డంతో మెగా ఫ్యాన్స్ హ్యాపీగా ఫీల‌వుతున్నార‌ట‌.