పిక్ టాక్: ఉబర్ కూల్ సూపర్ స్టార్ తో సర్కారు వారి డైరెక్టర్..!

'యువత' సినిమాతో దర్శకుడిగా ఇండస్ట్రీకి పరిచయమైన పరశురామ్ పెట్లా.. 'ఆంజనేయులు' మూవీలో మాస్ ఆడియన్స్ ని ఆకట్టుకున్నారు. ఈ క్రమంలో 'శ్రీరస్తు శుభమస్తు' చిత్రంతో ఫ్యామిలీ ఆడియన్స్ ని మెప్పించి.. 'గీత గోవిందం' సినిమాతో బ్లాక్ బస్టర్ అందుకున్నారు. ప్రస్తుతం సూపర్ స్టార్ మహేష్ బాబుతో ''సర్కారు వారి పాట'' అనే కమర్షియల్ ఎంటర్టైనర్ ని తెరకెక్కిస్తున్నారు.

నేడు పరశురామ్ పుట్టినరోజు కావడంతో మహేష్ బాబు సోషల్ మీడియా వేదికగా దర్శకుడికి శుభాకాంక్షలు తెలియజేశారు. ఈ సందర్భంగా 'సర్కారు వారి పాట' సెట్స్ లో తీసిన ఓ ఫోటోని అభిమానులతో పంచుకున్నారు. ఇందులో పరశురాం - మహేష్ ఇద్దరూ చిరునవ్వులు చిందిస్తూ కనిపిస్తున్నారు. హుడీ ధరించిన మహేష్ ఉబర్ కూల్ స్టైలిష్ గా ఉన్నారు. ఆయన మెడ మీద రూపాయి కాయిన్ టాటూ - చెవి పోగు ప్రత్యేక ఆకర్షణగా నిలిచాయి. ఇది సాంగ్ షూట్ లోని స్టిల్ అని తెలుస్తుంది.

మహేష్ బాబుతో సినిమా చేయడం తన డ్రీమ్ గా పేర్కొన్న పరశురామ్.. 'సర్కారు వారి పాట' సినిమాలో సూపర్ స్టార్ ని నెక్స్ట్ లెవల్ లో ప్రెజెంట్ చేస్తున్నారు. ఇప్పటికే విడుదలైన ఫస్ట్ లుక్ - టీజర్ లలో వింటేజ్ మహేష్ ని చూపించారు. ఫ్యాన్స్ కోరుకునే అన్ని అంశాలను జోడిస్తూ.. సందేశాత్మక కమర్షియల్ ఎంటర్టైనర్ గా ఈ చిత్రాన్ని తీర్చిదిద్దుతున్నారు. మరి పరశురామ్ కు ఈ సినిమా ఎలాంటి సక్సెస్ అందిస్తుందో చూడాలి.

'సర్కారు వారి పాట' లో భారతీయ రాజకీయ ఆర్థిక వ్యవస్థ - బ్యాంకుల కుంభకోణం - ప్రభుత్వ ఖజానా కొల్లగొట్టి విదేశాలకు పారిపోయిన ఆర్థిక నేరగాళ్ల గురించి ప్రస్తావించబోతున్నారని తెలుస్తోంది. ఇందులో మహేష్ బాబు సరసన కీర్తి సురేష్ హీరోయిన్ గా కనిపించనుంది. సముద్ర ఖని - ప్రకాష్ రాజ్ - వెన్నెల కిషోర్ - సుబ్బరాజు కీలక పాత్రలు పోషిస్తున్నారు.

మైత్రీ మూవీ మేకర్స్ - 14 రీల్స్ ప్లస్ - జీఎంబీ ఎంటర్‌టైన్‌మెంట్స్ సంస్థలు సంయుక్తంగా ఈ చిత్రాన్ని నిర్మిస్తున్నాయి. నవీన్ యెర్నేని - వై.రవిశంకర్ - రామ్ ఆచంట - గోపీచంద్ ఆచంట నిర్మాతలుగా వ్యవహరిస్తున్నారు. ఎస్.ఎస్. థమన్ సంగీతం సమకూరుస్తున్నారు. ఆర్. మది సినిమాటోగ్రఫీ అందిస్తుండగా.. మార్తాండ్ కె వెంకటేష్ ఎడిటింగ్ బాధ్యతలు స్వీకరించారు. ఏఎస్ ప్రకాష్ ఆర్ట్ డైరెక్టర్ గా వర్క్ చేస్తున్నారు. 'సర్కారు వారి పాట' సినిమా 2022 ఏప్రిల్ 1న ప్రేక్షకుల ముందుకు రాబోతోంది.