'అన్ స్టాపబుల్' ఫస్టు ఆప్షన్ బాలయ్య కాదట!

'ఆహా'లో 'అన్ స్టాపబుల్' టాక్ షో కోసం బాలకృష్ణను హోస్ట్ గా తీసుకున్నప్పుడు, అంతా కూడా ఆశ్చర్యపోయారు. బాలకృష్ణకి అసలే కోపం ఎక్కువ .. ఆయనతో పాటు స్టేజ్ పై సందడి చేయాలంటే కాస్తంత టెన్షన్ గానే ఉంటుంది. పైగా బాలయ్య తాను ఏది అనాలనుకుంటారో అది నిర్మొహమాటంగా అనేస్తారు .. అడిగేస్తారు. అందువలన ఈ షో ఎలా ఉంటుందోనని అంతా అనుకున్నారు. కానీ బాలకృష్ణ స్వభావానికి ఈ షో కరెక్టుగా సెట్ అయింది.

ఈ టాక్ షో ద్వారా అల్లు అరవింద్ ఏదైతే ఆశించారో అది జరిగిపోయింది .. నెంబర్ వన్ టాక్ అనిపించుకుంది. ఈ కాన్సెప్టు విన్న తరువాత బాలకృష్ణ అయితే ఎలా ఉంటుందని తాను తన టీమ్ ను అడిగాననీ, అప్పుడు అందరిలో వచ్చిన రియాక్షన్ చూసిన తరువాతనే బాలకృష్ణకి కాల్ చేశానని వేదికపై అల్లు అరవింద్ చెప్పారు. అడగ్గానే ఎంతమాత్రం ఆలస్యం చేయకుండా బాలకృష్ణ వెంటనే ఒప్పేసుకున్నారని అన్నారు.

ఇక ఈ టాక్ షోకి స్క్రిప్ట్ పరమైన పార్టిసిపేషన్ ను సినిమా రచయిత బీవీఎస్ రవి అందించాడు. తాజా ఇంటర్వ్యూలో ఆయన మాట్లాడుతూ, ఈ టాక్ షోకి బాలకృష్ణతో పాటు మరికొందరు స్టార్స్ ను అనుకున్నప్పటికీ, ఆ విషయాలను ఇప్పుడు ప్రస్తావించడం అనవసరమనే అభిప్రాయాన్ని వ్యక్తం చేశారు.

దాంతో బాలకృష్ణను కాకుండా ఎవరిని ఈ టాక్ షో కోసం అనుకుని ఉంటారు? అనే ఆసక్తి అందరిలో మొదలైంది. ఈ నేపథ్యంలో తాజాగా ఇద్దరు స్టార్ హీరోల పేర్లు వినిపిస్తున్నాయి. ఒకరు వెంకటేశ్ అయితే మరొకరు నాని. 'అన్ స్టాపబుల్' కోసం ముందుగా వెంకటేశ్ ను సంప్రదించారట.

వెంకటేశ్ కి మంచి సమయస్ఫూర్తి ఉంది. అందువలన ఈ షోను సరదాగా సందడిగా నడిపిస్తూ రక్తి కట్టిస్తాడని భావించారు. అయితే కరోనా పరిస్థితుల కారణంగా ఈ షో చేయడానికి వెంకటేశ్ అంగీకరించకపోవడంతో, నానీని సంప్రదించారట.

నానీకి యూత్ లోను .. ఫ్యామిలీ ఆడియన్స్ లోను మంచి క్రేజ్ ఉంది. అలాగే ఎదుటివారి మనసును నొప్పించకుండా తాను అనుకున్న సమాధానాలను రప్పించగల తెలివితేటలు ఉన్నాయి. 'బిగ్ బాస్' వంటి పెద్ద రియాలిటీ షోను నడిపించిన సామర్థ్యం ఉంది. అందువలన ఆయనను సంప్రదించారట. అయితే అప్పటికే నాని వరుస సినిమాలను ఒప్పేసుకుని ఉన్నాడు. అవన్నీ కూడా వరుసగా పూర్తి చేయవలసి ఉంది.

అంతే కాకుండా 'బిగ్ బాస్' సమయంలో వచ్చిన కామెంట్స్ కారణంగా కూడా ఆయన వెనక్కి తగ్గాడట. ఈ నేపథ్యంలోనే బాలకృష్ణ దగ్గరకి ఈ కాన్సెప్ట్ వెళ్లడం జరిగిందని చెప్పుకుంటున్నారు. ఇక ఆ తరువాత ఆయన ఎలా చెలరేగిపోయాడనేది అందరికీ తెలిసిందే