'అన్ స్టాప‌బుల్ -2' హోస్ట్ పీఠం ఎవ‌రిది?

`ఆహా` 2.0 లో నంద‌మూరి బాల‌కృష్ణ‌గా చేస్తోన్న‌ `అన్ స్టాప‌బుల్` ఎంత పెద్ద స‌క్సెస్ అయిందో చెప్పాల్సిన ప‌నిలేదు. టాలీవుడ్ హీరోల్ని అంద‌ర్ని ఒకే వేదిక‌పైకి తీసుకొచ్చి చేసిన ఈ ప్రోగ్రామ్ ఓటీటీ ప్లాట్ ఫామ్స్ లో కొత్త థాట్ గా చెప్పుకోవచ్చు. ఎన్నో ఓటీటీటీ వేదిక‌లు ఉన్నా అర‌వింద్ మాత్రమే ఇది చేయ‌గ‌లిగారు. మెగా నిర్మాత అల్లు అర‌వింద్ ఓటీటీ వేదిక‌పైకి తీసుకొచ్చిన ఈ షో తో ఆహా తెలుగులోగిళ్ల‌కి మ‌రింత చేరు అయింది. `ఆహా 2.0`కి అనూహ్య‌మైన‌ రెస్పాన్స్ వ‌చ్చింది. `అన్ స్టాప‌బుల్` చివ‌రి ఎపిసోడ్ ఇటీవ‌లే ప్ర‌సారం అయింది. అయితే ఇప్పుడు `అన్ స్టాప‌బుల్ -2`ని ప్లాన్ చేస్తున్నారు.

ఇందులో యాధావిధిగా బాల‌య్య హోస్ట్ గా కొన‌సాగుతురా? లేక మ‌రో బిగ్ స్టార్ ని రంగంలోకి దించుతారా? అన్న‌ది మ‌రోవైపు చ‌ర్చ సాగుతుండగా.. `అన్ స్టాప‌బుల్ 2`కి బాల‌య్య భారీగా పారితోషికం డిమాండ్ చేస్తున్నారు? అన్న ప్ర‌చారం అంతే వేగంగా జ‌రుగుతోంది. అన్ స్టాప‌బుల్ మొద‌టి భాగం పెద్ద స‌క్సెస్ అవ్వ‌డంతో బాల‌య్య రెట్టింపు పారితోషికం డిమాండ్ చేస్తున్నట్లు గుస‌గుస వినిపిస్తోంది.

మొద‌టి భాగం పెద్ద స‌క్సెస్ అయిన నేప‌థ్యంలో రెండ‌వ భాగానికి ఆయ‌న్నే హోస్ట్ గా లాక్ చేస్తార‌ని వినిపిస్తోంది. బాల‌య్య బ్రాండ్ తోనే 2.0 కి రీచ్ ఎక్కువ దొరికింది. అయితే బాల‌య్య కొన‌సాగుతారా? లేదా? అన్న దానిపై డైల‌మా ఉంది.

ఎందుకంటే `ఆహా` టాక్ షోకి స‌మంత హోస్ట్ గా వ్య‌వ‌హ‌రించారు. ఆ త‌ర్వాత మంచు ల‌క్ష్మి కూడా ఆహాలో ప్రోగ్రామ్ చేసారు. కానీ వాటిని ఇప్పుడు కొన‌సాగించ‌లేదు. ఆ ఇద్ద‌రు హ‌ఠాత్తుగా ఆహాని వ‌దిలి వెళ్లిపోయారు. ఆ షోస్ ప్ర‌ద‌ర్శ‌న‌కి సంబంధించి ఎలాంటి క్లూ కూడా లేదు. దీంతో బాల‌య్య విష‌యంలోనూ అదే జ‌రుగుతుందా? అనే సందేహం అభిమానుల్ని వెంటాడుతోంది.

ప్ర‌స్తుతం బాల‌య్య సినిమా క‌మిట్ మెంట్ల వేగం కూడా పుంజుకుంది. `అఖండ‌`తో భారీ స‌క్సెస్ అందుకున్న బాల‌య్య రెట్టించిన ఉత్సాహంలో ఉన్నారు. ప్ర‌స్తుతం గోపీచంద్ మ‌లినేని ద‌ర్శ‌క‌త్వంలో ఓ సినిమా చేస్తున్నారు. అలాగే యంగ్ మేక‌ర్ అనీల్ రావిపూడితోనూ మ‌రో ప్రాజెక్ట్ క‌మిట్. డ్యాషింగ్ డైరెక్టర్ పూరి జ‌గ‌న్నాధ్ బాల‌య్య కోసం వెయిట్ చేస్తోన్న సంగ‌తి తెలిసిందే.