Mrs. C నుంచి మిల్కీ బ్యూటీకి సూపర్ గిఫ్ట్!

మెగాస్టార్ చిరంజీవి తాజా చిత్రం 'సైరా' అక్టోబర్ 2 న ప్రేక్షకుల ముందుకు వచ్చింది. పాజిటివ్ టాక్ తో దూసుకుపోతున్న ఈ సినిమాకు సెలబ్రిటీల నుంచి ప్రశంసలు కూడా దక్కుతున్నాయి. ఈ సినిమాలో తమన్నా భాటియా ఒక హీరోయిన్ గా నటించిన సంగతి తెలిసిందే. నరసింహారెడ్డి ప్రియురాలు లక్ష్మిగా తమన్నా కనబరిచిన నటనకు ప్రేక్షకుల నుండి అద్భుత స్పందన లభిస్తోంది.

'సైరా' టైటిల్ సాంగ్ లో తమన్నా డ్యాన్స్ మూవ్స్.. హావభావాలు సినిమా చూసిన ప్రతి ఒక్కరినీ మెప్పించాయని చెప్పడం అతిశయోక్తి కాదు. తమన్నా పాత్రకు వస్తున్న రెస్పాన్స్ చూసి నిర్మాత రామ్ చరణ్ ఎంతో హ్యాపీగా ఫీలయ్యారట. దీంతో చరణ్ వైఫ్ ఉపాసన ఒక ఖరీదైన ఉంగరాన్ని తమన్నాకు బహుమతిగా ఇచ్చారు. ఈ విషయాన్ని ఉపాసన తన ట్విట్టర్ ఖాతా ద్వారా వెల్లడించడం విశేషం. తమన్నా ఆ రింగును ధరించిన ఫోటోను తన ట్విట్టర్ ఖాతా ద్వారా పోస్ట్ చేసిన ఉపాసన "నిర్మాత సతీమణి నుంచి సూపర్ తమన్నాకు ఓ బహుమతి. అప్పుడే నిన్ను మిస్ అవుతున్నాం. త్వరలో కలుద్దాం. #సైరా నరసింహారెడ్డి" అంటూ ట్వీట్ చేశారు.

తమన్నా ఫిలిం ఇండస్ట్రీకి వచ్చి దాదాపుగా 15 ఏళ్ళు అయింది. ఎప్పుడైతే ఫ్లాపులు వచ్చాయి.. ఇక తమన్నా పని అయిపోయింది అనే విమర్శలు వస్తాయో అప్పుడు మళ్ళీ బౌన్స్ బ్యాక్ అవుతుంది. ఈ ఏడాది మొదట్లో 'F2' సక్సెస్ తో అలానే జరిగింది. ఆ తర్వాత వరసగా తమన్నాకు ఫ్లాపులు పలకరించాయి. ఇప్పుడు మరోసారి 'సైరా' తో ప్రేక్షకుల నుంచి ప్రశంసలు అందుకుంటోంది.