ఇంట్రడక్షన్ సీక్వెన్స్ షూట్ లో 'ఏజెంట్'.. రిలీజ్ డేట్ పై క్లారిటీ ఇస్తారా..?

యూత్ కింగ్ అఖిల్ అక్కినేని నటిస్తున్న లేటెస్ట్ స్పై యాక్షన్ థ్రిల్లర్ ''ఏజెంట్''. స్టైలిష్ ఫిలిం మేకర్ సురేందర్ రెడ్డి ఈ చిత్రాన్ని తెరకెక్కిస్తున్నారు. అక్కినేని ఫ్యాన్స్ ఎంతో ఆసక్తిగా ఎదురుచూస్తున్న ఈ సినిమా షూటింగ్ చివరి దశకు చేరుకుంది. అయితే విడుదల తేదీపై ఇంకా క్లారిటీ రావడం లేదు.

వాస్తవానికి 'ఏజెంట్' చిత్రాన్ని లాంచ్ చేసిన రోజే 2021 డిసెంబర్ 21న రిలీజ్ చేయనున్నట్లు మేకర్స్ ప్రకటించారు. అయితే కరోనా పాండమిక్ నేపథ్యంలో అన్నీ అనుకున్నట్లు జరగలేదు. ఈ క్రమంలో 2022 ఆగస్ట్ 12న థియేటర్లలో విడుదల చేయాలని నిర్ణయించారు. కానీ ప్రొడక్షన్ ఆలస్యం కారణంగా నిరవధికంగా వాయిదా పడింది. అయితే మేకర్స్ ఇప్పుడు సరైన డేట్ కోసం చూస్తున్నారు.

అఖిల్ సినిమాని డిసెంబర్ 2న విడుదల చేయాలని భావించారని గత కొన్ని వారాలుగా సోషల్ మీడియాలో పుకార్లు వినిపించాయి. అయితే అదే రోజున అడివి శేష్ 'హిట్ 2' మూవీ రాబోతోందని అఫీషియల్ గా అనౌన్స్ చేశారు. దీంతో పాటుగా మైత్రీ మూవీ మేకర్స్ బ్యానర్ లో నందమూరి కళ్యాణ్ రామ్ హీరోగా నటిస్తున్న చిత్రాన్ని కూడా షెడ్యుల్ చేసినట్లు సమాచారం.

ఈ నేపథ్యంలో 'ఏజెంట్' చిత్రాన్ని కిస్మస్ సందర్భంగా రిలీజ్ చేయడానికి సాధ్యాసాధ్యాలను పరిశీలిస్తున్నారని ఊహాగానాలు వినిపిస్తున్నాయి. డిసెంబర్ 23వ తేదీకి వస్తున్నట్లు ప్రకటించిన 'ఖుషి' సినిమా వాయిదా పడితే.. ఆ డేట్ లో అఖిల్ చిత్రం వచ్చే అవకాశం ఉందని అంటున్నారు. అప్పుడు కుదరకపోతే వచ్చే ఏడాదికి వెళ్లాల్సి ఉంటుందని అభిప్రాయ పడుతున్నారు.

ఏదేమైనా 'ఏజెంట్' విడుదల తేదీని ఎప్పుడు ప్రకటిస్తారో అని వేచి చూస్తున్న అభిమానులు.. దీనిపై మేకర్స్ మౌనం వహిస్తుండటంతో ఆందోళన చెందున్నారు. తమ హీరో చిత్రానికి మంచి తేదీ దొరుకుందో లేదో అని ఆలోచనలో పడ్డారు. మరి త్వరలోనే ఈ విషయం మీద స్పష్టమైన సమాచారం అందిస్తారేమో చూడాలి.

ఇదిలా ఉంటే ప్రస్తుతం 'ఏజెంట్' సినిమాలో అఖిల్ ఇంట్రడక్షన్ సీక్వెన్స్ షూటింగ్ హైదరాబాద్ లో జరుగుతోంది. ఇది టాలీవుడ్ లో బెస్ట్ హీరో ఇంట్రడక్షన్ అవుతుందని ఇన్సైడ్ టాక్. సురేందర్ రెడ్డి స్టైలిష్ మేకింగ్‌ తో అఖిల్ ఎంట్రీకి గూస్‌ బంప్స్ గ్యారెంటీ అని.. అక్కినేని అభిమానులకు పండగలా ఉంటుందని అంటున్నారు.

ఈ నేపథ్యంలో నిర్మాత అనిల్ సుంకర స్పందిస్తూ.. 'A' ఫ్యాన్స్ ఏమి కోరుకుంటున్నారో అది 'S' టీమ్ ద్వారా డెలివర్ చేయబడుతుంది అని ట్వీట్ చేశారు. నిజానికి 'ఏజెంట్' ప్రారంభమైనప్పటి నుంచే ప్రొడ్యూసర్ సినిమాపై హైప్ పెంచుతూ వస్తున్నారు.

ఇప్పటికే అఖిల్ ఫస్ట్ లుక్ మరియు 'ఏజెంట్' టీజర్ కు అనూహ్య స్పందన లభించింది. అక్కినేని వారసుడి ట్రాన్స్ఫర్మేషన్ చూసి అందరూ షాక్ అయ్యారు. ఇందులో సాక్షి వైద్య హీరోయిన్ గా నటిస్తుండగా.. మలయాళ మెగాస్టార్ మమ్ముట్టి కీలక పాత్రలో కనిపించనున్నారు.

వక్కంతం వంశీ ఈ చిత్రానికి కథ అందించగా.. హిప్ హాప్ తమిజా సంగీతం సమకూరుస్తున్నారు. రసూల్ ఎల్లోర్ సినిమాటోగ్రఫీ నిర్వహిస్తున్నారు. రామబ్రహ్మం సుంకర సమర్పణలో ఎకె ఎంటర్‌టైన్‌మెంట్స్ మరియు సురేందర్2సినిమా బ్యానర్స్ పై అనిల్ సుంకర భారీ బడ్జెట్ తో ఈ చిత్రాన్ని నిర్మిస్తున్నారు.

''ఏజెంట్'' చిత్రాన్ని పాన్ ఇండియా వైడ్ థియేటర్లలోకి తీసుకురానున్నారు. తెలుగు, హిందీ, తమిళం, కన్నడ, మలయాళ భాషల్లో గ్రాండ్ గా విడుదల చేయడానికి మేకర్స్ సన్నాహాలు చేస్తున్నారు. అన్ని భాషల్లో ఒకేసారి రిలీజ్ చేయడానికి తగిన డేట్ దొరుకుతుందేమో చూడాలి.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.