అయ్యింది అంటూనే మళ్లీ అంత దూరం ఎందుకు చైతూ?

అక్కినేని హీరో నాగ చైతన్య థాంక్యూ సినిమా తో ప్రేక్షకుల ముందుకు వచ్చేందుకు సిద్ధంగా ఉన్నాడు. గత కొన్ని రోజులుగా థాంక్యూ సినిమా ప్రమోషన్ లో నాగ చైతన్య పాల్గొంటున్నాడు. విక్రమ్‌ కే కుమార్ దర్శకత్వంలో రూపొందిన థాంక్యూ సినిమా లో నాగ చైతన్య మూడు విభిన్నమైన వేరియేషన్స్‌ లో కనిపించబోతున్నాడని పోస్టర్స్ మరియు టీజర్‌ ట్రైలర్ చూస్తూ అర్థం అవుతుంది.

దర్శకుడు విక్రమ్‌ తన ప్రతి సినిమా ను కూడా చాలా విభిన్నమైన కథ మరియు కథనాలతో రూపొందిస్తూ ఉంటాడు. అందుకే మనం తర్వాత మళ్లీ థాంక్యూ సినిమా ను ఆయన దర్శకత్వంలో చేయడం జరిగింది. థాంక్యూ సినిమా లైన్ లో ఉండగానే విక్రమ్‌ దర్శకత్వంలో ధూత వెబ్ సిరీస్ ను చేస్తున్నాడు. ఇప్పటికే సగంకు పైగా షూటింగ్‌ పూర్తి అయ్యిందని ఇటీవలే అమెజాన్ అధికారికంగా ప్రకటన చేసింది.

తాజాగా థాంక్యూ సినిమా ప్రమోషనల్ ఇంటర్వ్యూలో కూడా నాగ చైతన్య ధూత గురించి స్పందించాడు. ఆ వెబ్‌ సిరీస్ లో హీరోయిన్ అంటూ ఉండరు. కొన్ని పాత్రలు అత్యంత కీలకంగా వెబ్‌ సిరీస్ సాగుతుంది.

షూటింగ్‌ ముగింపు దశకు వచ్చింది. త్వరలోనే షూటింగ్‌ పూర్తి అవుతుందని నాగ చైతన్య పేర్కొన్నాడు. అదే సమయంలో వెబ్ సిరీస్ స్ట్రీమింగ్‌ విషయంలో నిరాశ కలిగించే వ్యాఖ్యలు చేశాడు.

వెబ్ సిరీస్ ను వచ్చే ఏడాది జనవరిలో లేదా మొదటి రెండు మూడు నెలల్లోనే స్ట్రీమింగ్‌ చేయబోతున్నట్లుగా పేర్కొన్నాడు. ధూత షూటింగ్‌ దాదాపుగా పూర్తి అయ్యిందనే అంటున్నావు.. మరి విడుదలకు ఆరు నెలల సమయం ఎందుకు చైతూ అంటూ అభిమానులు సోషల్‌ మీడియా ద్వారా కామెంట్స్ చేస్తూ ప్రశ్నిస్తున్నారు.

వెబ్‌ సిరీస్ కోసం అక్కినేని ఫ్యాన్స్ తో పాటు చాలా మంది వెయిట్‌ చేస్తున్నారు. ఇప్పటి వరకు టాలీవుడ్‌ కు చెందిన స్టార్‌ హీరోలు వెబ్‌ సిరీస్ ల్లో ఎక్కువగా నటించిన దాఖలాలు లేవు. ఈయన ధూత వెబ్‌ సిరీస్ సక్సెస్ అయితే ఖచ్చితంగా ముందు ముందు చాలా మంది వెబ్‌ సిరీస్ బాట పట్టే అవకాశాలు కనిపిస్తున్నాయి. థాంక్యూ సినిమా సక్సెస్ అయితే ధూత కోసం మరింతగా ఎదురు చూపులు ఉండే అవకాశం ఉంది.