మహేష్ ఫ్యాన్స్ ఆశించే బ్లాక్ బస్టర్స్ వస్తాయా..?

సూపర్ స్టార్ మహేష్ బాబు గత కొన్నేళ్లుగా వరుస విజయాలతో దూసుకుపోతున్నారు. 'భరత్ అనే నేను' 'మహర్షి' 'సరిలేరు నీకెవ్వరు' వంటి సినిమాలు బాక్సాఫీస్ వద్ద సక్సెస్ అందుకున్నాయి. ఇటీవల వచ్చిన 'సర్కారు వారి పాట' చిత్రం కూడా హిట్ గానే పరిగణించబడుతోంది.

బ్యాక్ టూ బ్యాక్ హిట్స్ వస్తున్నాయి కానీ.. ఈ విజయాల పట్ల సూపర్ స్టార్ ఫ్యాన్స్ మాత్రం హ్యాపీగా లేరని తెలుస్తోంది. ఎందుకంటే ఇవన్నీ మహేష్ బాబు రేంజ్ హిట్లు కాదనేది వారు అభిప్రాయ పడుతున్నారు. ఈసారి బిగ్గెస్ట్ బ్లాక్ బస్టర్ అందుకొని.. తన స్టామినా ఏంటో బాక్సాఫీస్ కు చూపించాలని కోరుకుంటున్నారు.

మహేష్ గత కొంతకాలంగా ఒకే తరహా సినిమాలు చేస్తూ.. సబ్టిల్ రోల్స్ కే పరిమితం అవుతూ వస్తున్నారు. 'సర్కారు వారి పాట' తో ట్రాక్ మారుస్తారని అందరిలో భావించారు. అయితే అది కూడా అభిమానులను నిరుత్సాహ పరిచింది. మహేశ్ సరికొత్త లుక్ లో కనిపించాడు కానీ.. ఈ సినిమా కంటెంట్ పరంగా పూర్తి స్థాయిలో మెప్పించలేకపోయింది.

మహేష్ కాకుండా ఇంకో హీరో ఎవరు చేసినా ఈ సినిమాలు ప్లాప్ అయ్యేవని ఫ్యాన్స్ నుంచి కామెంట్స్ వస్తున్నాయి. ఇలాంటి పరిస్థితుల్లో రాబోయే త్రివిక్రమ్ శ్రీనివాస్ మరియు ఎస్ఎస్ రాజమౌళి చిత్రాలతో మహేష్ బాబు సాలిడ్ హిట్స్ అందుకోవాల్సిన అవసరం ఉంది.

'అతడు' 'ఖలేజా' వంటి చిత్రాల తర్వాత మహేష్ - త్రివిక్రమ్ కాంబినేషన్ లో SSMB28 మూవీ తెరకెక్కనున్న విషయం తెలిసిందే. దాదాపు పుష్కర కాలం తర్వాత వీరి కలయికలో రాబోతున్న ఈ సినిమాపై అభిమానులుల్లో భారీ అంచనాలు నెలకొన్నాయి. ఈ వారంలోనే ఈ ప్రాజెక్ట్ సెట్స్ మీదకు వెళ్లనుంది.

SSMB28 అనేది త్రివిక్రమ్ ట్రేడ్‌ మార్క్‌ ఫ్యామిలీ డ్రామాతో కూడిన అవుట్‌ అండ్‌ అవుట్‌ యాక్షన్‌ ఎంటర్టైనర్ అని తెలుస్తోంది. ఇది కచ్చితంగా అన్ని వర్గాల ప్రేక్షకులను ఆకట్టుకునే పక్కా కమర్షియల్ సినిమా అని అంటున్నారు. దీంతో ఇటు క్లాస్ అటు మాస్ ఆడియన్స్ ని టార్గెట్ చేయబోతున్నారు. ఇందులో మహేష్ న్యూ లుక్ లో కనిపించబోతున్నారు. 2023 సమ్మర్ లో ఈ సినిమా రిలీజ్ అవుతుంది.

ఇదే క్రమంలో మహేష్ బాబు చేయనున్న SSMB29 పైనా సూపర్ ఫ్యాన్స్ భారీ అంచనాలు పెట్టుకున్నారు. దర్శక ధీరుడు రాజమౌళి తెరకెక్కించే ఈ సినిమాతో ప్రపంచ వ్యాప్తంగా సంచలనం సృష్టిస్తారని భావిస్తున్నారు. ఇప్పటి వరకు తెలుగులోనే సినిమాలు చేస్తూ వచ్చిన మహేశ్.. ఈసారి పాన్ ఇండియా మార్కెట్ ని టార్గెట్ చేయనున్నారు.

మహేష్ - జక్కన్న సినిమా ఆఫ్రికన్ ఫారెస్ట్ బ్యాక్ డ్రాప్ లో అడ్వెంచరస్ యాక్షన్ థ్రిల్లర్ గా ఉంటుందని ప్రచారం జరుగుతుంది. బాహుబలి రచయిత విజయేంద్ర ప్రసాద్ ఇదే హింట్ ఇచ్చారు. ఇందులో మహేశ్ ని కొత్తగా ప్రెజెంట్ చేయడానికి ఆస్కారం వుంటుంది. వచ్చే ఏడాది ఈ భారీ ప్రాజెక్ట్ సెట్స్ మీదకు వెళ్లనుంది.

ఇలా మహేష్ నుంచి రాబోయే రెండు సినిమాలు కూడా క్రేజీ ప్రాజెక్ట్స్ అనే చెప్పాలి. ఇవి తప్పకుండా ఫ్యాన్స్ కోరుకునే సినిమాలు అవుతాయని.. బిగ్గెస్ట్ బ్లాక్ బస్టర్స్ అవుతాయని అభిమానులు భావిస్తున్నారు. ముందుగా త్రివిక్రమ్ సినిమాతో బిగ్ హిట్ కొడితే.. ఇది తదుపరి రాజమౌళి ప్రాజెక్ట్ కి చాలా ప్లస్ అవుతుంది. మరి రాబోయే రోజుల్లో ఏం జరుగుతుందో చూడాలి.




నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.