చైతూ కెరీర్ లోనే భారీ బడ్జెట్ తో.. కమర్షియల్ యాక్షన్ ఎంటర్టైనర్ గా NC22..!

నాలుగు బ్యాక్ టూ బ్యాక్ విజయాలతో ఫుల్ జోష్ లో ఉన్న యువ సామ్రాట్ అక్కినేని నాగచైతన్య కు 'థాంక్యూ' సినిమా బ్రేక్ వేసింది. ఇటీవల ప్రేక్షకుల ముందుకు వచ్చిన ఈ మూవీ బాక్సాఫీస్ వద్ద ప్లాప్ గా నిలిచింది. అలానే ఎన్నో ఆశలు పెట్టుకున్న బాలీవుడ్ డెబ్యూ 'లాల్ సింగ్ చద్దా' నిరాశ పరిచింది. దీంతో ఇప్పుడు చైతూ తదుపరి సినిమాతో కచ్చితంగా హిట్ కొట్టాల్సిన పరిస్థితి ఏర్పడింది

నాగచైతన్య హీరోగా కోలీవుడ్ డైరెక్టర్ వెంకట్ ప్రభు దర్శకత్వంలో #NC22 సినిమా రూపొందనున్న సంగతి తెలిసిందే. ఇది చైతూ కెరీర్ లోనే భారీ బడ్జెట్ తో చేస్తున్న ఫస్ట్ బైలింగ్విల్ మూవీ. తెలుగు, తమిళ భాషల్లో తెరకెక్కనుంది. ఇప్పటికే పూజా కార్యక్రమాలతో లాంఛనంగా ప్రారంభించబడిన ఈ సినిమా.. ఇప్పుడు రెగ్యులర్ షూటింగ్ కు రెడీ అవుతోంది.

తాజాగా NC22 మేకర్స్ ఈ చిత్రానికి సంబంధించిన షూటింగ్ అప్డేట్ అందించారు. ప్రస్తుతం ఈ సినిమా ప్రీ ప్రొడక్షన్ పనులు తుది దశకు చేరుకున్నాయని.. సెప్టెంబర్ మూడో వారం నుంచి హైదరాబాద్ లో రెగ్యులర్ షూటింగ్ ప్రారంభిస్తామని నిర్మాతలు తెలిపారు. ఈ షెడ్యూల్ లో చైతూతో పాటు ఇతర ప్రధాన తారాగణంపై కీలక సన్నివేశాలు చిత్రీకరించనున్నట్లు వెల్లడించారు.

NC22 అనేది ఒక కమర్షియల్ యాక్షన్ ఎంటర్టైనర్ అని మేకర్స్ తెలిపారు. ఇందులో నాగచైతన్య మునుపెన్నడూ చేయని పాత్రను పోషిస్తున్నారని.. ఆయన కెరీర్లోనే అత్యధిక బడ్జెట్ తో ఈ సినిమాని నిర్మిస్తున్నట్లు చెప్పుకొచ్చారు.

ఈ సినిమాలో చైత‌న్య‌కు జోడీగా యంగ్ బ్యూటీ కృతిశెట్టి హీరోయిన్‌ గా న‌టిస్తుంది. చై ఒక పోలీస్ ఆఫీసర్ పాత్రలో కనిపించనున్నాడని సమాచారం. అక్కినేని ఫ్యాన్స్ కోరుకునే మాస్ మరియు యాక్షన్ అంశాలు కలబోసి ఈ చిత్రాన్ని తెరకెక్కిస్తున్నారని తెలుస్తోంది.

NC22 చిత్రానికి మ్యాస్ట్రో ఇళ‌య‌రాజా మరియు ఆయన తనయుడు యువ‌న్ శంక‌ర్ రాజా సంగీత దర్శకులుగా వ్యవహరిస్తున్నారు. ఇప్పటికే యువన్ మ్యూజిక్ వర్క్ స్టార్ట్ చేసాడు. అబ్బూరి రవి ఈ సినిమాకు సంభాషణలు అందిస్తున్నారు. పవన్ కుమార్ సమర్పణలో శ్రీనివాస సిల్వ‌ర్ స్క్రీన్‌ ప‌తాకంపై శ్రీనివాస్ చిట్టూరి భారీ స్థాయిలో ఈ చిత్రాన్ని నిర్మించనున్నారు.

'మానాడు' వంటి బ్లాక్ బస్టర్ తర్వాత NC22 సినిమాతో టాలీవుడ్ లో ఎంట్రీ ఇస్తున్నాడు డైరెక్టర్ వెంకట్ ప్రభు. అలానే నాగచైతన్య నేరుగా కోలీవుడ్ లో తన అదృష్టాన్ని పరీక్షించుకోడానికి రెడీ అయ్యారు. వీరిద్దరూ కలిసి బాక్సాఫీస్ వద్ద ఎలాంటి విజయాన్ని అందుకుంటారో వచ్చే ఏడాది ప్రథమార్థం వరకూ వేచి చూడాల్సిందే.




నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.