స్వాతిముత్యం కోసం భాగ్య‌శ్రీ డాట‌ర్!

నిర్మాత బెల్లంకొండ సురేష్ త‌న‌యుడు, యంగ్ హీరో బెల్లంకొండ సాయి శ్రీ‌నివాస్ సోద‌రుడు బెల్లంకొండ గ‌ణేష్ హీరోగా తెరంగేట్రం చేసిన మూవీ 'స్వాతిముత్యం'. ల‌క్ష్మ‌ణ్ కె. కృష్ణ ద‌ర్శ‌కుడిగా ప‌రియ‌మైన ఈ మూవీని సితార ఎంట‌ర్ టైన్ మెంట్స్, ఫార్చూన్ ఫోర్ సినిమాస్ బ్యాన‌ర్ ల‌పై సూర్య‌దేవ‌ర నాగ‌వంశీ నిర్మించారు. రీసెంట్ గా ద‌స‌రా బ‌రిలో నిలిచిన ఈ మూవీ ఫీల్ గుడ్ ఎంట‌ర్ టైన‌ర్ గా మంచి టాక్ ని సొంతం చేసుకుని విజ‌య‌వంతంగా ప్ర‌ద‌ర్శింప‌బ‌డుతోంది.

ఇదిలా వుండ‌గా ఈ మూవీ త‌రువాత బెల్లంకొండ గ‌ణేష్ మ‌రో సినిమాని మొద‌లు పెట్టేశాడు. 'నేను స్టూడెంట్ సార్' అనే టైటిల్ తో యాక్ష‌న్ థ్రిల్ల‌ర్ గా రూపొందుతున్న ఈ మూవీని ఎస్ వీ 2 ఎంట‌ర్ టైన్ మెంట్స్ బ్యాన‌ర్ పై 'నాంది' స‌తీష్ వ‌ర్మ నిర్మిస్తున్నారు.

'నాంది' సినిమాతో తొలి ప్ర‌య‌త్నంలో నిర్మాణ రంగంలోకి అడుగు పెట్టిన స‌తీష్ వ‌ర్మ తొలి చిత్రంతో అభిరుచి గ‌ల నిర్మాత‌గా పేరు తెచ్చుకున్నాడు. మ‌లి ప్ర‌య‌త్నంగా విభిన్న‌మైన కథ‌తో చేస్తున్న సినిమా ఇది.

ఈ మూవీ ద్వారా రాఖీ ఉప్ప‌లపాటి ద‌ర్శ‌కుడిగా ప‌రిచ‌యం అవుతున్నారు. ద‌ర్శ‌కుడు కృష్ణ చైత‌న్య కథ అందించిన ఈ మూవీ ద్వారా హీరోయిన్ గా తెలుగు తెర‌కు న‌టి భాగ్య‌శ్రీ కూతురు అవంతిక దస్సాని ప‌రిచ‌యం అవుతోంది.

ఇటీవ‌ల బెల్లంకొండ గణేష్ ఫ‌స్ట్ లుక్ పోస్ట‌ర్ ని విడుద‌ల చేసిన చిత్ర బృందం సోమ‌వారం హీరోయిన్ అవంతిక పాత్ర‌ని ప‌రిచ‌యం చేస్తూ కొత్త పోస్ట‌ర్ ని విడుద‌ల చేశారు. సినిమాలో అవంతిక కాలేజీ స్టూడెంట్ శృతి వాసుదేవ్ గా క‌నిపించ‌బోతోంది.

సినిమాలోని కీల‌క పాత్ర‌ల్లో స‌ముద్ర‌ఖ‌ని, సునీల్, శ్రీ‌కాంత్ అయ్యంగార్‌, ఆటో రాంప్ర‌సాద్‌, చ‌ర‌ణ్ దీప్‌, ప్ర‌మోదిని, ర‌వి శివ‌తేజ‌ త‌దిత‌రులు న‌టిస్తున్నారు. ఈ సినిమాకు సంగీతం మ‌హ‌తి స్వ‌ర‌సాగ‌ర్‌, సినిమాటోగ్ర‌ఫీ అమిత్ మదాడిచ‌, ఛోటా కె. ప్ర‌సాద్ ఎడిటింగ్‌, క‌ల్యాణ్ చ‌క్ర‌వ‌ర్తి డైలాగ్స్ అందిస్తున్నారు. సినిమా షూటింగ్ పూర్త‌యింది. ప్ర‌స్తుతం పోస్ట్ ప్రొడ‌క్ష‌న్ కార్య‌క్ర‌మాలు జ‌రుగుతున్నాయి.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.