రాముడు కాద‌ప్పా రావ‌ణుడు కొలిసే రుద్ర‌కాళేశ్వ‌రుడు

మెగా ఫ్యామిలీ నుంచి హీరోగా తెరంగేట్రం చేసిన యంగ్ అండ్ టాలెంటెడ్ పంజా వైష్ణ‌వ్ తేజ్‌. మైత్రీ మూవీమేక‌ర్స్ తో స్టార్ డైరెక్ట‌ర్ సుకుమార్ క‌లిసి నిర్మించిన మ్యూజిక‌ల్ యాక్ష‌న్ ల‌వ్ స్టోరీ 'ఉప్పెన‌'. సానా బుచ్చి బాబు డైరెక్ట్ చేసిన ఈ మూవీతో పంజా వైష్ణ‌వ్ తేజ్ హీరోగా తెరంగేట్రం చేసిన విష‌యం తెలిసిందే. తొలి మూవీనే బాక్సాఫీస్ వ‌ద్ద సంచ‌ల‌న విజ‌యాన్ని సాధించి వంద కోట్ల క్ల‌బ్ లో చేర‌డంతో డెబ్యూ హీరోగా అరుదైన రికార్డుని వైష్ణ‌వ్ తేజ్ సొంతం చేసుకున్నాడు. ఈ మూవీలో అసి పాత్ర‌లో అద‌ర‌గొట్టి ప‌రిశ్ర‌మ వ‌ర్గాల దృష్టిని ఆక‌ర్షించాడు.

ఈ మూవీ త‌రువాత ప్రయోగాత్మ‌కంగా చేసిన 'కొండ పొలం' ఆశించిన ఫ‌లితాన్ని అందించ‌క‌పోవ‌డంతో మ‌ళ్లీ ల‌వ్ స్టోరీనే ఎంచుకున్నాడు వైష్ణ‌వ్ తేజ్‌. ఆయ‌న న‌టించిన తాజా చిత్రం 'రంగ రంగ వైభ‌వంగ‌' రిలీజ్ కి రెడీ అవుతోంది. ఈ నేప‌థ్యంలో మాస్ మ‌సాలా యాక్ష‌న్ ఎంట‌ర్ టైన‌ర్ కి గ్రీన్ సిగ్న‌ల్ ఇచ్చాడు. హై వోల్టేజ్ యాక్ష‌న్ ఎంట‌ర్ టైన‌ర్ గా రూపొందుతున్న ఓ మూవీలో వైష్ణ‌వ్ తేజ్ హీరోగా న‌టిస్తున్నారు. 'పెళ్లి సంద‌D' ఫేమ్ శ్రీ‌లీల త‌న‌కు జోడీగా న‌టిస్తోంది.

పీడీవీ ప్ర‌సాద్ స‌మ‌ర్ప‌ణ‌లో సితార ఎంట‌ర్ టైన్ మెంట్స్, ఫార్చూన్ ఫోర్ సినిమాస్ బ్యాన‌ర్ ల‌ పై సూర్య‌దేవ‌ర నాగ‌వంశీ, స్టార్ డైరెక్ట‌ర్ త్రివిక్ర‌మ్ వైఫ్ సాయి సౌజ‌న్య సంయుక్తంగా ఈ మూవీని నిర్మిస్తున్నారు. మాస్ యాక్ష‌న్ ఎంట‌ర్ టైన‌ర్ గా రూపొందుతున్న ఈ మూవీ ద్వారా శ్రీ‌కాంత్ రెడ్డి అనే నూత‌న ద‌ర్శ‌కుడు ప‌రిచ‌యం అవుతున్నారు. ప్రొడ‌క్ష‌న్ నం. 16గా రూపొందుతున్న ఈ మూవీ డైలాగ్ మోష‌న్ పోస్ట‌ర్ ని మేక‌ర్స్ బుధ‌వారం విడుద‌ల చేశారు.

నెవ‌ర్ బిఫోర్ మాస్ రోల్ లో హీరో వైష్ణ‌వ్ తేజ్ ని చూపించ‌బోతున్నామంటూ మేక‌ర్స్ మోష‌న్ పోస్ట‌ర్ లో వెల్ల‌డించారు. 'రేయ్ రాముడు లంక‌మీద ప‌డటం వినుంటాయ్ అదే ప‌ది త‌ల‌కాయ‌లున్నోడు ఇంటిమీద ప‌డితే ఎట్టుంటాదో సూస్తావా? ... అనే లైలాగ్ ల‌తో డైలాగ్ మోష‌న్ పోస్ట‌ర్ స్టార్ట‌యింది.

నీ అయోధ్య‌లో వుండేడిది రాముడు కాద‌ప్పా.. ఆ రావ‌ణుడే కొలిసే రుద్ర‌కాళేశ్వ‌రుడు..త‌ల‌లు కోసి సేతికిత్తా నాయాలా...సూసుకుందాం రా...' అంటూ విల‌న్ ని ఉద్దేశించి హీరో వైష్ణ‌వ్ తేజ్ చెబుతున్న డైలాగ్ లు సినిమా ఏ రేంజ్ హై వోల్టేజ్ యాక్ష‌న్ తో సాగనుందో స్ప‌ష్టం అవుతోంది.

రాయ‌ల సీమ నేప‌థ్యంలో ఈ సినిమా క‌థ సాగుతుంద‌ని సంభాష‌ణ‌ల్లో యాస‌ని బ‌ట్టి అర్థ‌మ‌వుతోంది. ఇక మోష‌న్ పోస్ట‌ర్ లో రుద్ర‌కాళేశ్వ‌రుడి త్రిశూలం.. డైలాగ్ మోష‌న్ పోస్ట‌ర్ ఎండింగ్ లో శివుడి వాహ‌న‌మైన గోమాత ప‌క్క‌న త్రిశూలం ప‌ట్టుకుని సీరియ‌స్ లుక్ తో వైష్ణ‌వ్ తేజ్ క‌నిపిస్తున్న తీరు సినిమాపై అంచ‌నాల్ని పెంచేస్తోంది. రుద్రుడికి రావ‌ణుడి లాంటి వాడికి మ‌ధ్య సాగే స‌మ‌రం నేప‌థ్యంలో ఈ మూవీ సాగు తుంద‌ని తెలుస్తోంది. గూస్ బంప్స్‌ని తెప్పించేలా యాక్ష‌న్ ఎంట‌ర్ టైన‌ర్ గా రూపొందుతున్న ఈ మూవీని వ‌చ్చే ఏడాది సంక్రాంతి విడుద‌ల చేయ‌నున్నార‌ట‌. ఈ మూవీకి సంబంధించిన న‌టీన‌టులు, సాంకేతిక నిపుణుల వివ‌రాలు త్వ‌ర‌లో చిత్ర బృందం వెల్ల‌డించ‌నుంది.