పాన్ ఇండియా మాస్టర్‌ 'యథారాజా తథాప్రజా'

తెలుగు కొరియోగ్రాఫర్‌ జానీ మాస్టర్ ప్రస్తుతం పాన్ ఇండియా స్థాయిలో సత్తా చాటుతున్నాడు. కేవలం తెలుగు సినిమాలకు మాత్రమే కాకుండా తమిళం.. హిందీ మరియు ఇతర భాషల సినిమాల పాటలకు కూడా కొరియోగ్రఫీ అందించి పాన్ ఇండియా కొరియోగ్రాఫర్ గా పాన్ ఇండియా మాస్టర్ గా గుర్తింపు దక్కించుకున్న జానీ మాస్టర్ హీరోగా ఎంట్రీ ఇవ్వబోతున్నాడు.

కొన్ని రోజుల క్రితమే జానీ మాస్టర్ హీరోగా ఒక సినిమా ప్రారంభం అయిన విషయం తెల్సిందే. ఆ సినిమాకు సంబంధించిన పోస్టర్ ను విడుదల చేశారు. టైటిల్ విషయంలో కూడా క్లారిటీ ఇవ్వడం జరిగింది. ఈ సినిమా కు యథారాజా తథాప్రజా అనే టైటిల్‌ ను ఖరారు చేశారు. అంతే కాకుండా పోస్టర్ లో జానీ మాస్టర్ ను చాలా మాస్ గా తాగుబోతు మాదిరిగా చూపించారు.

చెప్పులు చేతిలో పట్టుకుని నోట్లో సిగరెట్ తో గల్ల లుంగీ కట్టుకుని షర్ట్‌ బర్ట్స్ విప్పేసి వైన్స్ ముందు కూర్చుని పక్కన బీర్ సీసాలతో యమ మాస్ గా కనిపిస్తున్నాడు. జానీ మాస్టర్‌ అంటేనే మాస్‌ అంటారు.. అలాంటి జానీ మాస్టర్ ను ఈ మాస్ పోస్టర్ లో చూస్తే సినిమాలో ఏదో మ్యాటర్ ఉన్నట్లుగానే అనిపిస్తుంది.

శ్రీనివాస విట్టల దర్శకత్వంలో ఈ సినిమా రూపొందుతోంది. తెలుగు తో పాటు తమిళం మరియు కన్నడంలో కూడా ఈ సినిమాను రూపొందిస్తున్నట్లుగా పేర్కొన్నారు.

అన్ని భాషల్లో మంచి పాపులారిటీని దక్కించుకున్న జానీ మాస్టర్ నటించిన సినిమా అవ్వడం వల్ల ఈ సినిమాకు మంచి బజ్ క్రియేట్‌ అయ్యే అవకాశం ఉంది.

పైగా హీరోలతో ఉన్న సాన్నిహిత్యం వల్ల సినిమా కు మంచి పబ్లిసిటీ కూడా దక్కే అవకాశం ఉంది. ఈ సినిమా విడుదల తేదీని అతి త్వరలోనే ప్రకటించే అవకాశాలు ఉన్నాయి. ఫస్ట్‌ లుక్ కి పాజిటివ్‌ బజ్ క్రియేట్‌ అయిన నేపథ్యంలో సినిమా పై అంచనాలు పెరిగాయి.