'కస్టడీ' లో నాగచైతన్య..!

అక్కినేని వారసుడు, యువ సామ్రాట్ నాగ చైతన్య ప్రస్తుతం తమిళ విలక్షణ దర్శకుడు వెంకట్ ప్రభుతో ఓ సినిమా చేస్తున్న సంగతి తెలిసిందే. NC22 అనే వర్కింగ్ టైటిల్ తో సెట్స్ మీదకు వెళ్లిన ఈ మూవీ షూటింగ్ శరవేగంగా జరుగుతోంది. తెలుగు తమిళ భాషల్లో తెరకెక్కుతున్న ఈ బైలింగ్వల్ చిత్రానికి మేకర్స్ ''కస్టడీ'' అనే పవర్ ఫుల్ టైటిల్ ను ఖరారు చేసారు.

నేడు (అక్టోబర్ 23) నాగచైతన్య బర్త్ డే సెలబ్రేషన్స్ లో భాగంగా శుభకాంక్షలు తెలుపుతూ.. ''కస్టడీ'' టైటిల్ అనౌన్స్ మెంట్ తో పాటుగా ఫస్ట్ లుక్ పోస్టర్ ని ఆవిష్కరించారు. ఇందులో చైతూ ఒక పోలీస్ గా కనిపిస్తుండగా.. పోలీస్ స్టేషన్ లో మరికొందరు పోలీసులు అతన్ని గట్టిగా పట్టుకొని చుట్టూ గన్స్ గురి పెట్టి ఉన్నారు. ఎంతో ఆవేశంతో ఉన్న చై.. ఇంటెన్స్ గా కనిపిస్తున్నాడు.

''కస్టడీ'' సినిమాలో శివ అనే కానిస్టేబుల్ పాత్రలో నాగ చైతన్య కనిపించనున్నట్లు ఫస్ట్ లుక్ పోస్టర్ ని బట్టి తెలుస్తోంది. మెడలో రుద్రాక్షని కూడా గమనించవచ్చు. ప్రీ లుక్ పోస్టర్ లో 'అతని ఆవేశాన్ని ఏ శక్తీ అదుపు చేయదు' అని పేర్కొనగా.. ఇప్పుడు 'మీరు ప్రపంచంలో చూడాలనుకునే మార్పు మీరే అయి ఉండాలి' అని ప్రస్తావించారు. ఈ లైన్స్ ని బట్టి ఏదో బలమైన పాయింట్ తో ఈ చిత్రాన్ని తెరకెక్కిస్తున్నట్లు అర్థమవుతుంది.

'కస్టడీ' ఫస్ట్ లుక్ ని బట్టి నాగచైతన్య మరో భారీ మాస్ ప్రయత్నం చేస్తున్నట్లు కనిపిస్తోంది. వెంకట్ ప్రభు తనదైన శైలిలో కథ చెబుతూనే.. అక్కినేని హీరో మాస్ ఇమేజ్ ని ఆవిష్కరించనున్నారని తెలుస్తోంది. ఫ్యాన్స్ కోరుకునే మాస్ అండ్ యాక్షన్ అంశాలన్నీ ఈ కమర్షియల్ యాక్షన్ ఎంటర్టైనర్ లో ఉండేలా ప్లాన్ చేస్తున్నారు. చైతూ చాలా ఏళ్లుగా మాస్ ఇమేజ్ కోసం ట్రై చేస్తున్నారు. మరి ఈసారైనా వర్కౌట్ అవుతుందేమో చూడాలి.

ఈ సందర్భంగా డైరెక్టర్ వెంకట్ ప్రభు ట్వీట్ చేస్తూ.. 'ప్రపంచంలో మనం చూడాలనుకునే మార్పు మనమే కదా. పుట్టినరోజు శుభాకాంక్షలు చైతూ బ్రో. వేట ప్రారంభం!' అని పేర్కొన్నారు. 'కస్టడీ' టైటిల్ మరియు నాగచైతన్య ఫస్ట్ లుక్ పోస్టర్ రెస్పాన్స్ వస్తోంది. సినిమాపై అంచనాలను రెట్టింపు చేసాయని చెప్పాలి. యువసామ్రాట్ తన కెరీర్ లోనే తొలిసారిగా ఇలాంటి వైవిధ్యమైన సినిమా చేస్తున్నందుకు అందరూ ఆసక్తిగా ఎదురు చూస్తున్నారు.

''కస్టడీ'' సినిమాలో నాగచైతన్య సరసన కృతి శెట్టి హీరోయిన్ గా నటిస్తోంది. టాలెంటెడ్ యాక్టర్ అరవింద్ స్వామి - తమిళ సీనియర్ నటుడు శరత్ కుమార్ మరియు జాతీయ అవార్డు విన్నింగ్ నటి ప్రియమణి కీలక పాత్రలు పోషిస్తున్నారు. ప్రేమ్‌ జీ అమరన్ - వెన్నెల కిషోర్ - సంపత్ రాజ్ - 'కార్తీక దీపం' వంటలక్క ప్రేమి విశ్వనాథ్ తదితరులు ఇతర పాత్రల్లో కనిపించనున్నారు.

పవన్‌ కుమార్‌ సమర్పణలో శ్రీనివాసా సిల్వర్ స్క్రీన్ బ్యానర్‌ పై శ్రీనివాస చిట్టూరి ఈ ప్రతిష్టాత్మక ప్రాజెక్ట్‌ ని నిర్మిస్తున్నారు. ఇది నాగ చైతన్య కెరీర్‌ లోనే భారీ బడ్జెట్ సినిమా. అంతేకాదు చైతూకు డెబ్యూ తమిళ్ మూవీ.. వెంకట్ ప్రభుకు ఫస్ట్ స్ట్రెయిట్ తెలుగు సినిమా. మాస్ట్రో, ఇసైజ్ఞాని ఇళయరాజా మరియు లిటిల్ మాస్ట్రో యువన్ శంకర్ రాజా ఈ చిత్రానికి సంగీతం సమకూరుస్తున్నారు.

అబ్బూరి రవి ఈ చిత్రానికి డైలాగ్స్‌ రాస్తున్నారు. ఎస్‌ఆర్‌ కతిర్‌ సినిమాటోగ్రఫీ నిర్వహించగా.. రాజీవ్ ప్రొడక్షన్ డిజైనర్ గా.. డివై సత్యనారాయణ ఆర్ట్ డైరెక్టర్ గా వర్క్ చేస్తున్నారు. యాన్నిక్ బెన్ - మహేష్ మాథ్యూ యాక్షన్ కొరియోగ్రఫీ చేస్తుండగా.. వెంకట్ రాజన్ ఎడిటర్ గా వ్యవహరిస్తున్నారు. ''కస్టడీ'' సినిమా యువ సామ్రాట్ కు ఎలాంటి సక్సెస్ అందిస్తుందో చూడాలి.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.