సన్నాఫ్ సత్యమూర్తి తర్వాత తెలుగులో అందుకే నటించలేదు : ఉపేంద్ర

శాండల్ వుడ్ టాప్ స్టార్ ఉపేంద్ర గురించి మన తెలుగు ప్రేక్షకులకు పరిచయం చేయాల్సిన అవసరం లేదు. 'కన్యాదానం' 'ఏ' 'ఉపేంద్ర' 'రా' 'రక్త కన్నీరు' 'ఒకేమాట' 'స్టుపిడ్' చిత్రాలతో మన తెలుగు ప్రేక్షకులకు బాగా దగ్గరయ్యారు. ఉపేంద్ర కన్నడ సీమలో హీరోగా బిజీగా ఉంటూనే సినిమాలకు దర్శకత్వం కూడా వహిస్తూ వస్తున్నారు. ఆయన నటిస్తున్న ప్రతీ సినిమాను తెలుగులో డబ్ చేసి విడుదల చేస్తూ ఇక్కడ కూడా మార్కెట్ ఏర్పరచుకున్నాడు. నటనా, దర్శకత్వం.. ఏది చేసినా అందులో వైవిధ్యం చూపించేందుకు తపిస్తుంటారు ఉపేంద్ర. ఆయన చేసిన ప్రయోగాలు కొన్ని బాక్సాఫీస్ వద్ద ఎలాంటి సక్సెస్ ని అందుకున్నాయో స్పెషల్ గా చెప్పనవసరం లేదు. ప్రస్తుతం ఈ వర్సటైల్ యాక్టర్ కన్నడనాట రాజకీయాల్లో తలమునకలై ఉన్నారు. అయితే ఉపేంద్ర తెలుగు సినిమాల్లో నటించి చాలా కాలమవుతోంది. చివరగా 2015లో త్రివిక్రమ్ శ్రీనివాస్ దర్శకత్వంలో అల్లు అర్జున్ హీరోగా వచ్చిన 'సన్నాఫ్ సత్యమూర్తి' సినిమాలో స్పెషల్ పాత్రలో నటించాడు. ఈ సినిమా విజయం సాధించడమే కాకుండా ఉపేంద్రకి మంచి పేరుని కూడా తెచ్చిపెట్టించి. అయితే ఈ సినిమా తర్వాత వరుసగా ఆఫర్స్ వచ్చినప్పటికీ ఆయన ఒక్క సినిమా కూడా అంగీకరించలేదు. అయితే లాక్ డౌన్ కారణంగా ఇంటికే పరిమితమైన ఉపేంద్ర ఇటీవల ఒక తెలుగు వెబ్ ఛానల్ కి ఇంటర్వ్యూ ఇచ్చాడు. ఈ సందర్భంగా 'సన్నాఫ్ సత్యమూర్తి' సినిమా తర్వాత మరో తెలుగు సినిమా ఒప్పుకోకపోవడానికి గల కారణాలను చెప్పుకొచ్చాడు.

ఉపేంద్ర మాట్లాడుతూ.. 'సన్నాఫ్ సత్యమూర్తి తర్వాత టాలీవుడ్‌లో కనిపించకపోవడానికి కారణం కన్నడలో బిజీగా ఉండటమే. అలాగే సినిమాలతో పాటు పాలిటిక్స్‌తో కూడా బిజీగా ఉన్నాను. మంచి ఆఫర్ వస్తే ఖచ్చితంగా టాలీవుడ్‌లో చేస్తాను. ప్రస్తుతం ‘బాక్సర్’ అనే చిత్రంలో గెస్ట్ రోల్‌ లో కనిపించబోతున్నాను. నా వరకు వస్తే నేను సన్నాఫ్ సత్యమూర్తి చిత్రంలో చేసిన పాత్ర లాంటివి ఇష్టపడతాను. అందులో నా పాత్రకి చాలా ఇంపార్టెన్స్ ఉంటుంది. అలాంటి పాత్రలు చేయడానికి నేను రెడీ. కానీ నా దగ్గరికి స్క్రిప్ట్స్ తో వస్తున్న వారు ఎక్కువగా విలన్‌ గా చేయమని అడుగుతున్నారు. అందుకే నా మైండ్ ఎటూ తేల్చుకోలేక డైలెమాలో ఉండి పోయిందని' చెప్పుకొచ్చారు. ఇదిలా ఉండగా ఉపేంద్ర సూపర్ స్టార్ మహేష్ - పరశురామ్ కాంబినేషన్ లో తెరకెక్కనున్న సినిమాలో నటించబోతున్నట్లు వార్తలు వస్తున్నాయి. ప్రస్తుతం ఉపేంద్ర నటిస్తున్న తాజా చిత్రం ‘కబ్జా’. లగడపాటి శ్రీధర్‌ సమర్పణలో చంద్రశేఖర్‌ ఈ సినిమాను నిర్మిస్తున్నారు. ఆర్‌.చంద్రు దర్శకత్వం వహిస్తున్న ఈ చిత్రాన్ని తెలుగు - తమిళం - కన్నడ - మలయాళం - ఒరియా - మరాఠీ భాషల్లో పాన్‌ ఇండియన్‌ స్థాయిలో ఈ సినిమాను రూపొందిస్తున్నారు. పీరియాడిక్‌ కథాంశంతో తెరకెక్కుతున్న అండర్‌ వరల్డ్‌ చిత్రమిది. ఈ మధ్యే ఈ సినిమాకి సంభందించిన ఉపేంద్ర ఫస్ట్‌ లుక్‌ చిత్ర బృందం విడుదల చేసింది.