'ఉప్పెన' మీద మ‌న‌సు పారేసుకున్న బాలీవుడ్ స్టార్ హీరో..?

మెగా హీరో పంజా వైష్ణవ్ తేజ్ - కృతి శెట్టి జంటగా నటించిన ''ఉప్పెన'' సినిమా రికార్డ్ స్థాయి వసూళ్లు రాబట్టిన సంగతి తెలిసిందే. బుచ్చిబాబు సానా దర్శకత్వంలో మైత్రీ మూవీ మేకర్స్‌ - సుకుమార్ రైటింగ్స్‌ నిర్మించిన ఈ సినిమా 100 కోట్ల క్లబ్ లో చేరిపోయినట్లు మేకర్స్ అధికారిక పోస్టర్ కూడా వదిలారు. అయితే ఈ చిత్రాన్ని తమిళ్ హిందీ భాషల్లో రీమేక్ చేయడానికి సన్నాహాలు జరుగుతున్నాయని ఫిలిం సర్కిల్స్ లో టాక్ నడుస్తోంది. ఇప్పటికే 'ఉప్పెన' రీమేక్ తో ఇలయదలపతి విజయ్ కుమారుడు సంజయ్ ని హీరోగా పరిచయం చేయనున్నారని వార్తలు వస్తున్నాయి. ఈ క్రమంలో బాలీవుడ్‌‌ లో కూడా 'ఉప్పెన'ను రీమేక్ చేయనున్నారనే వార్తలు మొదలైయ్యాయి.

'ఉప్పెన' సినిమాపై బాలీవుడ్ స్టార్ వరుణ్ ధావన్ మనసు పారేసుకున్నాడట. ఈ సినిమాను వరుణ్ హిందీలో రీమేక్ చేయాల‌ని పావులు క‌దుపుతున్న‌ట్లుగా బాంబే వర్గాలు చెబుతున్నాయి. ఇందులో హీరోయిన్ గా కీర్తి శెట్టినే తీసుకోవాల‌ని అనుకుంటున్నార‌ట‌. అయితే మైత్రీ టీమ్ ఈ రీమేక్ రైట్స్ విష‌యంలో భారీ రేట్ చెప్ప‌డంతో ఈ డీల్ ప్ర‌స్తుతానికి హోల్డ్ లో ఉన్న‌ట్లుగా టాక్ నడుస్తోంది. అలానే ఇషాన్ ఖట్టర్ - అనన్య పాండే హీరోహీరోయిన్లుగా ఈ రీమేక్ తెరకెక్కే అవకాశాలు ఉన్నాయని రూమర్స్ కూడా వస్తున్నాయి. ఇదిలావుండగా 'ఉప్పెన' చిత్రం హిందీలో వచ్చిన 'సైరత్' మూవీతో పాటు మణిరత్నం 'కడలి' సినిమాలని కలిపి కాస్తా అటు ఇటు చేసి తెరకెక్కించారనే కామెంట్స్ ఉన్నాయి. ఈ నేపథ్యంలో 'ఉప్పెన' చిత్రాన్ని ఇతర భాషల్లో రీమేక్ చేస్తారా లేదా అనేది చూడాలి.