మామయ్య బర్త్‌ డేకు ఆ విషయం క్లారిటీ ఇచ్చిన 'వైష్ణవ్‌'

మెగా ఫ్యామిలీ నుండి హీరోగా వైష్ణవ్‌ తేజ్‌ ఎంట్రీ ఇవ్వబోతున్నాడు. కరోనా కారణంగా వైష్ణవ్‌ తేజ్‌ మొదటి సినిమా 'ఉప్పెన' ఆలస్యం అవుతుంది. ఇప్పటికే షూటింగ్‌ పూర్తి చేసుకుని విడుదలకు సిద్దం అయిన ఉప్పెనను ఓటీటీలో విడుదల చేసే అవకాశం ఉందంటూ చాలా రోజులుగా మీడియాలో వార్తలు వస్తున్నాయి. అయితే వైష్ణవ్‌ తేజ్‌ మొదటి సినిమా అవ్వడం వల్ల థియేటర్లలో విడుదల అయితేనే బాగుంటుందని మెగా ఫ్యామిలీ ఓటీటీ విడుదలను వ్యతిరేకిస్తుంది. నాని 'వి' మరియు సాయి ధరమ్‌ తేజ్‌ 'సోలో బ్రతుకే సోబెటర్‌' సినిమాలు ఓటీటీ విడుదలకు రెడీ అయిన కారణంగా ఉప్పెన కూడా ఓటీటీ విడుదల అయ్యే అవకాశం ఉందని మళ్లీ ప్రచారం జోరుగా సాగుతోంది.

ఉప్పెన సినిమా ఓటీటీ విడుదల విషయంలో ఇప్పటి వరకు నిర్మాతల నుండి ఎలాంటి క్లారిటీ రాలేదు. గతంలో తాము ఓటీటీ ద్వారా విడుదల చేయాలనుకోవడం లేదు.. థియేటర్ల ప్రారంభం కోసం వెయిట్‌ చేస్తున్నాం. ఎలాంటి నిర్ణయాన్ని ప్రస్తుతానికి తీసుకోలేదు అంటూ క్లారిటీ ఇచ్చాడు. అప్పుడు ఆగిపోయిన పుకార్లు మళ్లీ పుట్టుకు వచ్చిన నేపథ్యంలో ఉప్పెన టీం స్పందించాలని అంతా కోరుకున్నారు. సినిమాను ఓటీటీకి ఇచ్చారంటూ వస్తున్న వార్తలకు పవన్‌ బర్త్‌ డే పోస్టర్స్‌ తో క్లారిటీ ఇచ్చారు.

మైత్రి మూవీ మేకర్స్‌ మరియు సుకుమార్‌ రైటింగ్స్‌ కలయికలో నిర్మాణం జరిగిన ఉప్పెన సినిమా టీం నుండి పవన్‌ కళ్యాణ్‌ బర్త్‌ డేకు శుభాకాంక్షలు తెలియజేశారు. ఈ సందర్బంగా పోస్టర్‌ ల ఎక్కడ కూడా ఏ ఓటీటీకి సంభంధించి లోగోను వేయలేదు. కనుక ఇప్పటి వరకు ఓటీటీలతో చర్చలు జరిగాయి అంటూ వస్తున్న వార్తలు అన్ని అబద్దం అని తేలిపోయింది. కనుక ఉప్పెన సినిమా థియేటర్లలోనే విడుదల అవ్వడం కన్ఫర్మ్‌.