ఊర్వశి పాటను చెడగొట్టారే..

క్లాసిక్ సినిమాల్ని రీమేక్ చేస్తే ఎలా బోల్తా కొడుతుంటాయో.. క్లాసిక్ పాటల్ని రీమిక్స్ చేసినా అంత బాగా అనిపించవు. ఇలాంటి వాటిని ముట్టుకోకుండా వదిలేస్తేనే బెటర్. కానీ సినీ జనాలు అలా వదిలేయరు. మళ్లీ మళ్లీ ఇలాంటి ప్రయత్నాలు చేస్తూనే ఉంటారు. ఏఆర్ రెహమాన్ కెరీర్ ఆరంభంలో అందించిన క్లాసిక్ పాటల్లో ‘ఊర్వశి ఊర్వశి’ ఒకటి. ‘ప్రేమికుడు’ సినిమాలోని ఈ పాట అప్పట్లో సంగీత ప్రియుల్ని ఉర్రూతలూగించింది. ఇది తమిళ సినిమా పాట అయినా సరే.. దేశవ్యాప్తంగా మార్మోగింది. ఈ పాటను రీమిక్స్ చేయడానికి సాహసించాడు బాలీవుడ్ సింగర్ యోయో హనీ సింగ్. సినిమా కోసం కాకుండా ప్రైవేట్‌ గా ఈ పాటను చిత్రీకరించారు. అతను ఇలా వీడియో సాంగ్స్ రూపొందించడం కొత్తేమీ కాదు. పేరున్న బాలీవుడ్ తారలతోనే యోయో ఇలాంటి ప్రయోగాలు చేస్తుంటాడు.

ఈ కోవలోనే ‘ఊర్వశి’ పాటను రీమిక్స్ చేశాడు. హిందీ ‘అర్జున్ రెడ్డి’లో జోడీగా నటించనున్న షాహిద్ కపూర్-కియారా అద్వానీ ఈ పాటలో కనిపించారు. దీని వీడియో ఈ రోజే లాంచ్ చేశారు. ఐతే ‘ఊర్వశి’ పాటలోని మాధుర్యం ఏమీ ఇందులో కనిపించలేదు. ఒరిజినల్ పాటకు ఇది అసలు మ్యాచే కాలేదు. ఈ పాటను మొదలుపెట్టిన విధానమే బాగా లేదు. ‘ఊర్వశి’ పాటను అమితంగా ఇష్టపడ్డ జనాలకు ఇది పేలవంగా అనిపిస్తోంది. ఇక డ్యాన్సుల సంగతైతే చెప్పాల్సిన పని లేదు. షాహిద్ మంచి డ్యాన్సరే కానీ.. ప్రభుదేవా ముందు అతను తేలిపోయాడు. కియారా అందాలు మాత్రమే ఈ పాటకు ఆకర్షణ. ఈ పాటలో ఒక కాన్సెప్ట్ కూడా ఉంది. బైక్ మీద వచ్చి పార్టీలో అమ్మాయిని పడేసి.. ఆమె లగ్జరీ కారును కొట్టుకెళ్లిపోయే కాన్సెప్ట్ తో ఈ పాటను రూపొందించారు. అదేమీ అంత థ్రిల్లింగ్ గా లేదు. పాటలో విజువల్ గ్రాండియర్ కనిపిస్తోంది కానీ.. ఒరిజినల్ సాంగ్ కి మాత్రం ఇది దరిదాపుల్లో కూడా లేదన్న ఫీలింగ్ కలగుతోంది జనాలకు.