మన యూవీ వారి అరవ ప్రాజెక్ట్‌ షురూ

తెలుగు హీరోలు ఇతర భాషల్లో గుర్తింపు దక్కించుకోవడం మాత్రమే కాకుండా ఇతర భాషల సినిమాల్లో నటిస్తున్నారు. మన దర్శకులు కూడా ఇతర భాషల్లో సినిమాలు చేస్తూ బిజీగా ఉన్నారు. ఇదే సమయంలో మన నిర్మాతలు కూడా ఇతర భాషల్లో సినిమాలను నిర్మించేందుకు క్యూ కడుతున్నారు. అల్లు అరవింద్‌ చాలా సంవత్సరాల క్రితమే హిందీలో నిర్మాణం మొదలు పెట్టారు.

మరి కొందరు కూడా హిందీ మరియు ఇతర భాషల్లో సినిమాలను నిర్మిస్తూ ఉండేవారు. కాని చాలా తక్కువ మంది మాత్రమే గతంలో ఇతర భాషల్లో నిర్మాణం చేపట్టడం మనం చూశాం. కాని ఇప్పుడు దిల్ రాజు వరుసగా తమిళం లో సినిమాలను నిర్మిస్తున్నాడు. కేవలం దిల్‌ రాజు మాత్రమే కాకుండా మరి కొందరు నిర్మాతలు కూడా ఇతర భాషల్లో నిర్మాణం పట్ల ఆసక్తి చూపిస్తున్నారు.

ప్రభాస్ ఓన్ బ్యానర్ గా పిలవబడుతున్న యూవీ క్రియేషన్స్ బ్యానర్ ప్రస్తుతం తెలుగు లో భారీ సినిమాలతో పాటు చిన్న సినిమాలు కూడా నిర్మిస్తున్న విషయం తెల్సిందే. ఈ సమయంలోనే తమిళం లో కూడా యూవీ క్రియేషన్స్ సినిమా ను చేసేందుకు సిద్ధం అయ్యింది. అక్కడ చిన్నా చితకా సినిమా కాకుండా స్టార్‌ హీరో సూర్య తో సినిమా ను చేసేందుకు సిద్ధం అయ్యింది.

ప్రముఖ తమిళ నిర్మాత జ్ఞానవేల్‌ రాజా తో కలిసి సూర్య హీరోగా శివ దర్శకత్వంలో ఒక భారీ యాక్షన్‌ సినిమాను నిర్మించేందుకు యూవీ క్రియేషన్స్ వారు చెన్నై లో ల్యాండ్‌ అయ్యారు. తాజాగా ఈ సినిమా షూటింగ్‌ కార్యక్రమాలు కూడా లాంచనంగా జరిగాయి. సూర్య తో యూవీ క్రియేషన్స్ వారికి ఉన్న సాన్నిహిత్యంతో ఈ సినిమా వర్కౌట్ అయినట్లుగా తెలుస్తోంది.

గతంలో సూర్య నటించిన తమిళ సినిమా లను యూవీ వారు తెలుగు లో విడుదల చేయడం జరిగింది. అందుకే ఇప్పుడు యూవీ క్రియేషన్స్‌ వారిని తమిళంలో సినిమాను నిర్మించే అవకాశంను సూర్య ఇచ్చినట్లుగా తెలుస్తోంది. త్వరలోనే యూవీ వారు మరిన్ని తమిళ సినిమాలతో పాటు బాలీవుడ్‌ సినిమాలను కూడా నిర్మించే అవకాశాలు ఉన్నాయంటూ ఇండస్ట్రీ వర్గాల ద్వారా సమాచారం అందుతోంది.