చెన్నై బాక్సాఫీస్ షేకైపోతోంది

మూడేళ్ల నిరీక్షణ ఫలిస్తోంది. సిలంబరసన్ అలియాస్ శింబు సినిమా ‘వాలు’ ఎట్టకేలకు తమిళనాట రిలీజవబోతోంది. ఆగస్టు 14న ఈ సినిమా విడుదలకు రంగం సిద్ధమైంది. విడుదలకు సంబంధించి అన్ని వివాదాలనూ శింబు పరిష్కరించుకున్నాడు. అసలు ఎప్పటికైనా విడుదలవుతుందా లేదా అని అనుమానాలు కలిగించిన సినిమా.. శింబు కెరీర్ లోనే ఎన్నడూ లేనంత హంగామా మధ్య భారీ స్థాయిలో విడుదల కాబోతోంది. అడ్వాన్స్ బుకింగ్స్ ఓ రేంజిలో జరుగుతున్నాయి. శింబు అభిమానుల హంగామా మామూలుగా లేదు. బల్క్ బుకింగ్స్ తో రచ్చ చేస్తున్నారు.

రజినీకాంత్, విజయ్ లాంటి బడా స్టార్ల సినిమా విడుదలైనపుడు ఎంత హంగామా ఉంటుందో.. శింబు కూడా ఈ సినిమా వరకు అంత క్రేజ్ తెచ్చుకోవడం విశేషం. రెండేళ్లుగా పలుమార్లు, అనేక వివాదాల కారణంగా వాయిదా పడుతూ వచ్చిన సినిమా ఎట్టకేలకు రిలీజవుతుండటంతో అభిమానుల ఆనందం మామూలుగా లేదు. ‘వాలు’ టికెట్ బుక్ చేసుకోవడాన్ని ప్రెస్టీజియస్ గా ఫీలవుతున్నారు. టికెట్లు కొని ట్విట్టర్ లో షేర్ చేస్తూ మురిసిపోతున్నారు. మామూలుగా శింబు సినిమాలు నచ్చని వాళ్లు సైతం ‘వాలు’ సినిమా చూడ్డానికి ఆసక్తి చూపిస్తుండటం విశేషం. దీంతో శింబు సినిమాల్లో వాలు హైయెస్ట్ గ్రాసర్ అవుతుందన్న అంచనాలున్నాయి. ఓపెనింగ్స్ మాత్రం భారీగా ఉండటం ఖాయం. ఈ సినిమా విడుదల ఆగిపోతోందని ఓ దశలో కన్నీళ్లు కూడా పెట్టుకున్నాడు శింబు. మొత్తానికి అతడి నిరీక్షణ ఈ శుక్రవారం ఫలించబోతోంది.