నారీ నారీ న‌డుమ‌ మెగా మేన‌ల్లుడు వైష్ణ‌వ్

మెగా మేన‌ల్లుడు వైష్ణవ్ తేజ్ న‌టించిన ఉప్పెన సంచ‌ల‌న విజ‌యం సాధించిన సంగ‌తి తెలిసిందే. ఆరంగేట్ర న‌టుడిగా అత‌డు అన్ని ప‌రిశ్ర‌మ‌ల్లో అప్ప‌టివ‌ర‌కూ ఉన్న రికార్డుల్ని బ్రేక్ చేయ‌డం సంచ‌ల‌న‌మైంది. అత‌డు క్రిష్ ద‌ర్శ‌క‌త్వంలో కొండ‌పొలం అనే ప్ర‌యోగాత్మ‌క చిత్రంలోనూ న‌టిస్తున్నాడు. ఒక న‌వ‌ల ఆధారంగా ఈ సినిమా రూపొందుతోంది. టాకీ చిత్రీక‌ర‌ణ పూర్త‌యి ప్ర‌స్తుతం పోస్ట్ ప్రొడ‌క్ష‌న్ సాగుతోంది.

గతవారం వైష్ణ‌వ్ తన మూడో సినిమా షూటింగ్ ప్రారంభించిన సంగ‌తి తెలిసిందే. అర్జున్ రెడ్డి తమిళ రీమేక్ ఆదిత్య వర్మ దర్శకుడు గిరీశయ్య ఈ చిత్రానికి దర్శకత్వం వహిస్తున్నారు. అత్తారింటికి దారేది నిర్మాత‌ బివిఎస్ఎన్ ప్రసాద్ దీనిని నిర్మిస్తున్నారు. ఇంకా టైటిల్ నిర్ణ‌యించ‌ని ఈ చిత్రంలో ఢిల్లీ ఇన్ స్టాగ్రామ్ బ్యూటీ కేతిక శర్మ హీరోయిన్‌గా నటిస్తున్నారు. కేతిక ఇంత‌కుముందు పూరి కుమారుడు ఆకాష్ స‌ర‌స‌న రొమాంటిక్ చిత్రంలో న‌టిస్తోంది. అలాగే ల‌క్ష్య చిత్రంలోనూ నాయిక‌గా న‌టించింది.

తాజా స‌మాచారం మేర‌కు.. ఈ సినిమాలో ఓ కీలక పాత్ర కోసం బాలీవుడ్ యువ నాయిక‌ శోభిత రానాను ఎంపిక చేశారు. శోభిత టాలీవుడ్ అరంగేట్ర చిత్ర‌మిది. ఆమె ఇంతకు ముందు కొన్ని హిందీ చిత్రాలలో (రామ్ రాజ్య అండ్ ఇష్క్ బ్రాందీ) నటించింది. యాక్షన్ ఎంటర్ టైనర్ `షాడో`తో శాండల్ వుడ్ లో అరంగేట్రం చేయడానికి సిద్ధంగా ఉంది. శోభిత న‌ట‌నాభిన‌యం.. ప్ర‌తిభ.. అదృష్టాన్ని బ‌ట్టి టాలీవుడ్ లో మ‌రిన్ని అవ‌కాశాలు అందుకునే ఛాన్సుంది.