గీతా ఆర్ట్స్ లో వైష్ణవ్ తేజ్?

వైష్ణవ్ తేజ్ 'ఉప్పెన' సినిమాతో ఎంట్రీ ఇస్తూనే 100 కోట్ల వసూళ్లను కొల్లగొట్టేశాడు. బుచ్చిబాబు దర్శకత్వంలో ఆయన చేసిన ఈ సినిమా, అన్ని వర్గాల ప్రేక్షకులను విపరీతంగా ఆకట్టుకుంది. కథాకథనాల పరంగా ఈ సినిమా ఆయనను యూత్ తో పాటు మాస్ ఆడియన్స్ కి కూడా చేరువ చేసింది. కుర్రాడికి ఫస్టు సినిమానే అయినా, ఎక్కడా తడబడలేదని అందరి నుంచి మంచి మార్కులు కొట్టేశాడు. కొంచెం కష్టపడితే దూసుకుపోతాడనే చెప్పుకున్నారు. ఆ తరువాత ఆయన నుంచి 'కొండ పొలం' వచ్చింది. అప్పటికే షూటింగు జరుపుకున్న ఈ సినిమా పెద్ద గ్యాప్ లేకుండానే ప్రేక్షకులను పలకరించింది.

క్రిష్ దర్శకత్వం వహించిన ఈ సినిమా 'కొండ పొలం' అనే పుస్తకం ఆధారంగా నిర్మితమైంది. ఈ సినిమాలో వైష్ణవ్ తేజ్ జోడీగా రకుల్ అలరించింది. కథాకథనాలు .. కీరవాణి పాటలకు వంక బెట్టవలసిన అవసరం లేదు. అయితే 'ఉప్పెన'లో కుర్ర హీరోయిన్ సరసన అలరించిన ఈ కుర్రాడిని సీనియర్ హీరోయిన్ జోడీగా చూడలేకపోయారు. కాంబినేషన్ కరెక్ట్ గా లేదనే విమర్శ గట్టిగానే వినిపించింది. ఇక ఆ సినిమా సంగతి అలా ఉంచితే ప్రస్తుతం వైష్ణవ్ తేజ్ .. గిరీశయ్య దర్శకత్వంలో ఒక సినిమా చేస్తున్నాడు. బీవీఎస్ ఎన్ ప్రసాద్ నిర్మిస్తున్న ఈ సినిమాలో, వైష్ణవ్ తేజ్ జోడీగా కేతిక శర్మ నటిస్తోంది.

ఇక ఆ తరువాత ఆయన షైన్ స్క్రీన్ బ్యానర్ పై ఒక సినిమా .. అన్నపూర్ణ బ్యానర్లో ఒక సినిమా చేయనున్నాడు. గీతా ఆర్ట్స్ 2 లోను ఒక సినిమా చేయడానికి రంగం సిద్ధమవుతోందని అంటున్నారు. అయితే దర్శకుడు ఎవరనే విషయంలో ఇంకా క్లారిటీ రావలసి ఉంది. ఈ మధ్య కాలంలో గీతా ఆర్ట్స్ 2 వారు కొత్త దర్శకులకు వరుస అవకాశాలు ఇస్తూ వెళుతున్నారు. అలా ఒక కొత్త దర్శకుడు వినిపించిన కథను వైష్ణవ్ తేజ్ తో చేస్తారా? లేదంటే 'బొమ్మరిల్లు' భాస్కర్ తో చేస్తారా? అనే విషయంలో క్లారిటీ రావలసి ఉంది.

ఇటీవల గీతా ఆర్ట్స్ 2 నుంచి బొమ్మరిల్లు భాస్కర్ దర్శకత్వంలో వచ్చిన అఖిల్ సినిమా భారీ విజయాన్ని అందుకుంది. దాంతో ఆయనతో మరో సినిమాను చేయనున్నట్టుగా వార్తలు వచ్చాయి. బన్నీవాసుకు ... బొమ్మరిల్లు భాస్కర్ కి మధ్య మంచి సాన్నిహిత్యం ఉంది. అందువలన ఈ కాంబినేషన్లో మరో ప్రాజెక్టు రావడానికి అవకాశాలైతే ఉన్నాయి. ఏం జరుగుతుందో చూడాలి మరి. మొత్తానికి ఇప్పుడున్న యంగ్ హీరోలకు గట్టిపోటీ ఇవ్వాలనే 'ఉప్పెన' హీరో డిసైడైపోయాడన్న మాట.