సెట్స్ మీదకు వెళ్లిన మెగా మేనల్లుడి మూడో సినిమా..!

మెగాస్టార్ చిరంజీవి మేనల్లుడు, సాయి తేజ్ తమ్ముడు పంజా వైష్ణవ్ తేజ్ 'ఉప్పెన' సినిమాలతో హీరోగా ఇండస్ట్రీలోకి గ్రాండ్ ఎంట్రీ ఇచ్చిన సంగతి తెలిసిందే. డెబ్యూ హీరోగా సరికొత్త రికార్డులు క్రియేట్ చేసిన వైష్ణవ్.. ఫస్ట్ సినిమాతో బాక్సాఫీస్ వద్ద సుమారు రూ.100 కోట్ల గ్రాస్ రాబట్టాడు. దీంతో తొలి సినిమాతోనే క్రేజీ హీరోగా మారిపోయిన వైష్ణవ్, పెద్ద బ్యానర్ల నుంచి క్రేజీ ఆఫర్స్ అందుకున్నాడు. ఈ క్రమంలో శ్రీ వెంకటేశ్వర సినీ చిత్ర బ్యానర్ లో ఓ చిత్రాన్ని మొదలు పెట్టాడు.

'అర్జున్‌ రెడ్డి' చిత్రాన్ని తమిళంలో రీమేక్‌ చేసి సక్సెస్ అందుకున్న టాలెంటెడ్ డైరెక్టర్ గిరీశయ్య దర్శకత్వంలో వైష్ణవ్ తేజ్ హీరోగా నటిస్తున్నాడు. ఇప్పటికే ఈ చిత్రాన్ని పూజా కార్యక్రమాలతో లాంఛనంగా ప్రారంభించారు. అయితే కరోనా సెకండ్ వేవ్ పరిస్థితుల తర్వాత సోమవారం ఈ చిత్రానికి సంబంధించిన రెగ్యులర్ షూటింగ్ స్టార్ట్ చేశారు. హైదరాబాద్ లో జరుగుతున్న ఈ షెడ్యూల్ లో ప్రధాన తారాగణం పాల్గొనే కొన్ని కీలక సన్నివేశాల చిత్రీకరణ జరుపనున్నారు.

ఇది మెగా మేనల్లుడికి మూడో సినిమా. ఈ మూవీలో వైష్ణవ్ తేజ్ సరసన 'రొమాంటిక్' 'లక్ష్య' ఫేమ్ కేతిక శర్మ హీరోయిన్ గా నటిస్తోంది. బి.వి.ఎస్‌.ఎన్‌.ప్రసాద్‌ ఈ చిత్రాన్ని నిర్మించనున్నారు. ఈ చిత్రానికి సంబంధించిన పూర్తి వివరాలు త్వరలోనే వెల్లడించనున్నారు. కాగా, ఇప్పటికే పలు చిత్రాలకి గ్రీన్ సిగ్నల్ ఇచ్చిన వైష్ణవ్ తేజ్.. క్రిష్ జాగర్లమూడి దర్శకత్వంలో తన రెండో చిత్రాన్ని పూర్తి చేశాడు. క్రిష్ బ్యానర్ లో రూపొందుతున్న ఈ చిత్రంలో రకుల్ ప్రీత్ సింగ్ హీరోయిన్ గా నటిస్తోంది. ఇంకా టైటిల్ ప్రకటించని ఈ చిత్రాన్ని త్వరలోనే విడుదల చేయనున్నారు.

ఇకపోతే అన్నపూర్ణ స్టూడియోస్ బ్యానర్ లో వైష్ణవ్ తేజ్ తో అక్కినేని నాగార్జున ఓ సినిమా రూపొందించనున్నారు. డెబ్యూ డైరెక్టర్ పృథ్వీ తెరకెక్కించే ఈ చిత్రం హాకీ బ్యాక్ డ్రాప్ లో స్పోర్డ్స్ డ్రామా అని.. వైష్ణవ్ హాకీ ప్లేయర్ గా కనిపిస్తారని ప్రచారం జరుగుతోంది. ప్రస్తుతం ప్రీ ప్రొడక్షన్ దశలో ఉన్న ఈ మూవీని త్వరలోనే ప్రారంభించే అవకాశం ఉంది.