మ‌రీ అంత క్లాస్ టైటిల్ సూట‌వుతుందా?

మెగా మేన‌ల్లుడు సాయి తేజ్ సోద‌రుడు వైష్ణ‌వ్ తేజ్ డెబ్యూ సినిమాతోనే వంద కోట్ల క్ల‌బ్ హీరోగా సంచ‌ల‌నాలు సృష్టించిన సంగ‌తి తెలిసిందే. మైత్రి మూవీ మేక‌ర్స్ లో సానా బుచ్చిబాబు ఈ చిత్రాన్ని తెర‌కెక్కించారు. ఆ త‌రవాత క్రిష్ ద‌ర్శ‌క‌త్వంలో వ‌చ్చిన కొండ‌పొలం ఫెయిలైంది. అయినా వైష్ణ‌వ్ కెరీర్ కి డోఖా లేదు.

ప్ర‌యోగాలు చేస్తూనే క‌మ‌ర్షియ‌ల్ హిట్లు కొట్టే స‌త్తా త‌న‌కు ఉంద‌ని నిరూపించ‌గ‌ల‌డు. ఇక అత‌డు న‌టిస్తున్న త‌దుప‌రి చిత్రానికి టైటిల్ ని ఖ‌రారు చేశారు. ఈ సినిమాకి రంగ రంగ వైభ‌వంగా అనే క్లాసిక్ టైటిల్ ని ఎంపిక చేయ‌డం ఆస‌క్తిని క‌లిగిస్తోంది. ఈ చిత్రాన్ని ఎస్‌.వి.సి.సి సంస్థ నిర్మిస్తోంది. గిరీశ‌య్య‌ ద‌ర్శ‌కుడు. సోమ‌వారం ఉద‌యం 11 గంట‌ల‌కు టైటిల్ ని అధికారికంగా ప్ర‌క‌టించ‌నున్నారు.

ఇందులో రొమాంటిక్ ఫేం కేతిక శ‌ర్మ క‌థానాయిక‌. దేవిశ్రీ సంగీతం అందిస్తున్నాడు. అర్జున్ రెడ్డి కోడైరెక్ట‌ర్ గా గిరీశ‌య్య సుప‌రిచితం. ఇప్పుడు ఆయ‌న వైష్ణ‌వ్ తో హిట్టు కొట్ట‌డ‌మే ధ్యేయంగా సినిమాని తెర‌కెక్కిస్తున్నారు. అయితే వైష్ణ‌వ్ పూర్తిగా మాస్ లుక్ ఉన్న హీరో .. అత‌డికి మ‌రీ అంత క్లాసిక్ టైటిల్ సూట‌వుతుందా? అన్న‌దానికి కాల‌మే స‌మాధానం చెప్పాలి.