అమెరికాలో `వకీల్ సాబ్` రికార్డ్ బ్రేక్

న‌ట‌సింహా నంద‌మూరి బాలకృష్ణ `అఖండ` ఇంటా బ‌య‌టా బాక్సాఫీస్ వద్ద వసూళ్ల హ‌వా సాగిస్తోంది. ఓవైపు ఒమిక్రాన్ భ‌యాలు వెంటాడుతున్నా జ‌నం థియేట‌ర్ల‌కు వ‌స్తున్నార‌న‌డానికి ఇదే ప్రూఫ్‌. ముఖ్యంగా అమెరికాలో ఒమిక్రాన్ టెన్ష‌న్స్ అలుముకున్నా దానికి న‌ట‌సింహా చెక్ పెట్టిన‌ట్టే క‌నిపిస్తోంది.

రెండవ లాక్‌డౌన్ తర్వాత తెలుగు సినిమాకి సంబంధించి ఇప్పటివరకు విడుదలైన అతి పెద్ద సినిమాగా అఖండ రికార్డుకెక్కింది. బాలకృష్ణతో బోయపాటి శ్రీను హ్యాట్రిక్ చిత్ర‌మిది. వ‌సూళ్ల ప‌రంగా బ్లాక్ బస్టర్ టాక్ ను అందుకుంది. తెలుగు రాష్ట్రాల్లోనే కాకుండా అమెరికాలోనూ ఈ సినిమా మంచి వసూళ్లను రాబడుతోంది.

తాజా స‌మాచారం మేర‌కు.. ఈ చిత్రం ఇప్పటివరకు 750 కె డాల‌ర్లు వసూలు చేసింది. ఒక మిలియన్ డాలర్లు వసూలు చేసే దిశగా దూసుకుపోతోంది. అఖండ అమెరికాలో వకీల్ సాబ్ టోటల్ రన్ ను అధిగ‌మించింది. 2021లో అమెరికాలో అత్యధిక తెలుగు గ్రాసర్ లలో 3వ స్థానంలో నిలిచింది. ఇక వ‌కీల్ సాబ్ రిలీజ్ స‌మ‌యంలో సెకండ్ వేవ్ టెన్ష‌న్స్ అట్టుడికించ‌డంతో ఆ సినిమా వ‌సూళ్ల‌కు గండి ప‌డిన సంగ‌తిని మ‌రువ‌లేం.

అఖండ చిత్రాన్ని ద్వారకా క్రియేషన్స్ బ్యానర్ పై మిరియాల రవీందర్ రెడ్డి నిర్మించారు. థమన్ ఎస్ ఈ చిత్రానికి సంగీతం అందించారు. రాధాకృష్ణ ఎంటర్ టైన్ మెంట్స్ ఈ చిత్రాన్ని ఓవర్సీస్ లో విడుదల చేసింది. ఈ చిత్రంలో ప్రగ్యా జైస్వాల్ కథానాయికగా నటించ‌గా పూర్ణ- శ్రీకాంత్- నితిన్ మీనన్- జగపతి బాబు తదితరులు ఈ చిత్రంలో కీలక పాత్రలు పోషించారు. `అఖండ` త‌ర్వాత భారీ క్రేజుతో రిలీజ‌వుతున్న చిత్రంగా `పుష్ప` పేరు ప్ర‌స్తుతం మార్మోగుతోంది.