#వ‌కీల్ సాబ్ టీజ‌ర్.. రికార్డులన్నీ బ్రేక్ చేస్తుందా?

సోష‌ల్ మీడియా.. డిజిట‌ల్ యుగంలో ప్ర‌చారం ప‌రంగా పోటీ అనేది విభిన్నంగా ఉంది. యూట్యూబ్ స‌హా ఇన్ స్టా.. ట్విట్ట‌ర్ వంటి చోట్ల దూసుకెళ్ల‌డం స్టార్ల‌కు ఇంపార్టెంట్ గా మార‌డంతో ఈ వేదిక‌పై పోటీ ర‌చ్చ‌కు తెర లేపుతోంది. స్టార్ హీరోల సినిమాలు రిలీజ‌వుతున్నాయి అంటే వాటికి సంబంధించిన ప్ర‌మోష‌న‌ల్ మెటీరియ‌ల్ ని వైర‌ల్ చేసేందుకు ఫ్యాన్స్ అంతే పోటీప‌డుతున్నారు.

ఇప్పుడు ప‌వ‌ర్ స్టార్ ప‌వ‌న్ క‌ల్యాన్ కంబ్యాక్ మూవీ `వ‌కీల్ సాబ్` ని బ్లాక్ బ‌స్ట‌ర్ చేయాల‌న్న పంతం ఫ్యాన్స్ లో క‌నిపిస్తోంది. ఈ మూవీకి సంబంధించిన ఎలాంటి ప్ర‌క‌ట‌న వెలువ‌డినా సోష‌ల్ మీడియాల్లో అది వేగంగా వైర‌ల్ అవుతోంది. ప‌వన్ కంబ్యాక్ పెద్ద రేంజులో ఉండాల‌ని రికార్డుల ప‌రంగా సంచ‌ల‌నాలు సృష్టించాల‌ని ప‌వ‌న్ ఫ్యాన్స్ కోరుకుంటున్నారు.

ఇదే స‌మ‌యంలో వ‌కీల్ సాబ్ నుంచి టీజ‌ర్ రిలీజ్ కి రెడీ అవుతోంది. ఈ టీజ‌ర్ అంత‌ర్జాలంలో స‌రికొత్త రికార్డులు నెల‌కొల్ప‌డం ఖాయంగానే క‌నిపిస్తోంది. ప‌వ‌న్ న‌టించిన `అజ్ఞాత‌వాసి` రిలీజై చాలా కాలం అవ్వ‌డంతో ఫ్యాన్స్ ఎంతో ఉత్కంఠ‌గా ఎదురు చూస్తున్న వ‌కీల్ సాబ్ టీజ‌ర్ పై భారీ అంచ‌నాలే ఏర్పడ్డాయి. మోస్ట్ అవైటెడ్ టీజర్ పాత రికార్డులను బ్రేక్ చేస్తుంద‌ని భావిస్తున్నారు. ఇప్ప‌టికే సోష‌ల్ మీడియాల్లో ప‌వ‌న్ ఫ్యాన్స్ ర‌చ్చ మామూలుగా లేదు. ఇత‌ర స్టార్ల‌తో పోలిక‌లు పెడుతూ త‌మ ఫేవరెట్ హీరో రికార్డుల్ని మ‌రోసారి గుర్తు చేసుకుంటున్నారు.

బాలీవుడ్ బ్లాక్ బ‌స్ట‌ర్ పింక్ రీమేక్ గా వ‌కీల్ సాబ్ తెర‌కెక్కుతోంది. ఇందులో శృతిహాసన్ క‌థానాయిక‌గా న‌టిస్తుండ‌గా.. నివేతా థామస్.. అంజలీలు కీల‌క పాత్ర‌లు పోషిస్తున్నారు. థమన్ ఈ చిత్రానికి సంగీతం అందిస్తున్నారు. ఈ చిత్రాన్ని దిల్ రాజు - బోనిక‌పూర్ సంయుక్తంగా నిర్మిస్తున్నారు.