బిగ్ అప్డేట్: ఏప్రిల్ లో థియేటర్స్ లో అడుగుపెట్టనున్న 'వకీల్ సాబ్'

పవర్ స్టార్ పవన్ కళ్యాణ్ సినిమాల్లోకి రీ ఎంట్రీ ఇస్తున్న చిత్రం 'వకీల్ సాబ్'. ఇది హిందీ 'పింక్' చిత్రానికి తెలుగు రీమేక్ గా రానుంది. వేణు శ్రీరామ్ దర్శకత్వం వహించిన ఈ చిత్రాన్ని బోనీ క‌పూర్ స‌మ‌ర్ప‌ణ‌లో శ్రీ వెంక‌టేశ్వ‌ర క్రియేష‌న్స్‌ బ్యానర్ పై దిల్‌ రాజు - శిరీష్ ఈ చిత్రాన్ని నిర్మించారు. ఇటీవలే విడుదలైన టీజర్ ఈ సినిమాపై అంచనాలు పెంచేసింది. ఈ క్రమంలో పవన్ కళ్యాణ్ ని స్క్రీన్ పై ఎప్పుడెప్పుడా చూద్దామా అని ఆతృతగా ఎదురుచూస్తున్న అభిమానులకు చిత్ర యూనిట్ అదిరిపోయే న్యూస్ అందించింది. 'వకీల్ సాబ్' రిలీజ్ డేట్ ఫిక్స్ చేసినట్లు తాజాగా వెల్లడించారు.

'వకీల్ సాబ్' చిత్రాన్ని ఇప్పటి వరకు అందరూ అనుకుంటున్నట్లే ఏప్రిల్ 9న ప్రపంచ వ్యాప్తంగా విడుదల చేయనున్నట్లు మేకర్స్ ప్రకటించారు. ఈ సందర్భంగా పవన్ కి సంబంధించిన ఓ పోస్టర్ ని కూడా విడుదల చేశారు. పవన్ లాయర్ గా నటిస్తున్న ఈ చిత్రంలో శృతి హసన్ ఆయనకు జోడీగా నటించింది. నివేధా థామస్ - అంజలి - అనన్య - ప్రకాష్ రాజ్ ఇతర ప్రధాన పాత్రలు పోషించారు.

థమన్ సంగీతం సమకూరుస్తున్న ఈ చిత్రానికి పీఎస్ వినోద్ సినిమాటోగ్రాఫర్ గా వ్యవహరించాడు. ఎప్పుడో రిలీజ్ కావాల్సిన 'వకీల్ సాబ్' సినిమా కరోనా కారణంగా లేట్ అవుతూ వచ్చి ఇప్పుడు ఏప్రిల్ 9న థియేటర్స్ లో అడుగుపెట్టనున్నాడు.