డైరెక్టర్ మాట: అజిత్ విశ్వరూపమే 'వలిమై'

తమిళనాట అజిత్ కి ఉన్న క్రేజ్ అంతా ఇంతా కాదు. ఆయన సినిమా వస్తుందంటే మాస్ ఆడియన్స్ కి పండగే. అందువలన వాళ్లంతా ఆయన సినిమా కోసం వేయికళ్లతో వెయిట్ చేస్తుంటారు. అజిత్ మంచి అందగాడు .. ఆయన తరువాత అంతటి అందగాడు ఇండస్ట్రీకి రాలేదనే విషయాన్ని చాలామంది ఒప్పుకుంటారు. సహజంగా హ్యాండ్సమ్ గా ఉన్న హీరోలకి మాస్ ఇమేజ్ అంత తేలికగా దొరకదు. అయినా అజిత్ అక్కడి మాస్ ఆడియన్స్ లో విపరీతమైన ఫాలోయింగ్ ను సంపాదించుకున్నాడు. తన ప్రతి సినిమాలోనూ మాస్ అంశాలు తగ్గకుండా చూసుకుంటూ ఉంటాడు.

అజిత్ కి కొంత కాలంగా ఫ్లాప్ అనేది తెలియకుండా పోయింది. ఆరేళ్లుగా ఆయన వరుసగా భారీ విజయాలను అందుకుంటూ వస్తున్నాడు. ఆ విజయపరంపరను అలాగే కొనసాగించాలనే పట్టుదలతో ఆయన ఉన్నాడు. అలా ఆయన తాజా చిత్రంగా 'వలిమై' రానుంది. హెచ్ వినోద్ దర్శకత్వం వహించిన ఈ సినిమా జనవరి 13వ తేదీన ప్రేక్షకుల ముందుకు రానుంది. ఈ సినిమాను అజిత్ కెరియర్లోనే అత్యధిక థియేటర్స్ లో రిలీజ్ చేయడానికి ప్లాన్ చేస్తున్నారు. యాక్షన్ తో కూడిన ఎమోషన్ తోనే ఈ కథ నడవనుంది. తనదైన స్టైల్లో ఈ సినిమాను వినోద్ రూపొందించాడు.

మొదటి నుంచి కూడా అజిత్ కి ఒక అలవాటు ఉంది .. తన కారణంగా నష్టపోయిన నిర్మాతలకు ఆయన వెంటనే మరో సినిమాను చేసిపెడుతుంటాడు. అలాగే తనకి హిట్ ఇచ్చిన దర్శకులు ఆ తరువాత ఇబ్బందుల్లో ఉంటే పిలిచి మరీ వాళ్లకి అవకాశం ఇస్తుంటాడు. అలాగే తనకి ఒక హిట్ ఇచ్చిన దర్శకుడితో ఆ వెంటనే మరో సినిమాను చేస్తుంటాడు. అలాగే 'నెర్కొండ పారవై' సినిమాతో తనకి హిట్ ఇచ్చిన వినోద్ కి కూడా 'వలిమై' ఛాన్స్ ఇచ్చాడు. హీరోగా ఆయన ఎదగడానికి వెనుక ఆయన వ్యక్తిత్వం కూడా ఒక కారణమని ఆయన గురించి తెలిసిన వాళ్లంతా చెప్పుకుంటూ ఉంటారు. అందువలన అజిత్ సినిమా హిట్ అయితే, దానిని ఇండస్ట్రీ హిట్ గా భావిస్తుంటారు.

తాజాగా ఈ సినిమాను గురించి దర్శకుడు వినోద్ మాట్లాడుతూ .. "ఇంతవరకూ అజిత్ చేసిన సినిమాలు ఒక ఎత్తు .. ఈ సినిమా ఒక ఎత్తు. భారీతనం విషయంలోను .. ప్రత్యేకతలు విషయంలోను ఈ సినిమా ఆయన కెరియర్లో చెప్పుకోదగినదిగా నిలుస్తుంది. ఇంతవరకూ సంచలన విజయాలను సాధించిన ఆయన సినిమాల జాబితాలో ఈ సినిమాకి కూడా చోటు దొరుకుంతుందనే నమ్మకం ఉంది. ఈ సినిమాలో డూప్ లేకుండా అజిత్ చేసే కొన్ని రిస్కీ యాక్షన్ సీన్స్ ప్రేక్షకులను ఆశ్చర్యచకితులను చేస్తాయి. ఇంతవరకూ ఆయన చేసిన సినిమాలకి నెక్స్ట్ లెవెల్లో ఈ సినిమా ఉంటుంది.

నిజానికి ఇంతటి స్టార్ డమ్ మీద రిస్క్ చేయవలసిన అవసరం అజిత్ కి లేదు. కానీ తన అభిమానుల కోసం ఆయన ఈ యాక్షన్ సీక్వెన్స్ చేశాడు. ఇక బైక్ పై ఆయన పాల్గొన్న ఛేజింగ్ సీన్స్ ఈ సినిమాకి హైలైట్ గా నిలుస్తాయి. కొన్ని యాక్షన్ ఎపిసోడ్స్ .. ఛేజింగ్ సీన్స్ హాలీవుడ్ సినిమాలను గుర్తుకు చేస్తాయి. అజిత్ సినిమా ఎలా ఉండాలనుకునే ఆయన అభిమానులు థియేటర్స్ కి వస్తారో .. అలాగే ఈ సినిమా ఉంటుంది. కొత్త ఏడాదిలో కొత్త విజయాన్ని అజిత్ కి అందించే అవకాశం నాకు లభించడం ఆనందంగా ఉంది" అని ఆయన చెప్పుకొచ్చాడు.

ఈ సినిమాలో అజిత్ ను ఎదుర్కొనే పవర్ఫుల్ విలన్ గా కార్తికేయ కనిపించనున్నాడు. ఇంతవరకూ వదిలిన టీజర్లు .. ట్రైలర్స్ వలన ఆయనకి కూడా మంచి క్రేజ్ వచ్చింది. ఈ సినిమా తరువాత కార్తికేయకి కోలీవుడ్ లో అవకాశాలు పెరగడం ఖాయమని అంటున్నారు. ఇక ఇతర ముఖ్యమైన పాత్రల్లో హుమా ఖురేషి .. వాణి భోజన్ .. సుమిత్ర .. యోగిబాబు కనిపించనున్నారు. బోనీ కపూర్ నిర్మించిన ఈ సినిమాపై తమిళంలో భారీ అంచనాలు ఉన్నాయి. ఈ సినిమాతో అజిత్ వసూళ్ల పరంగా కొత్త రికార్డులను నమోదు చేయడం ఖాయమనేది అభిమానుల మాట.