2022 సంక్రాంతికి కొల్ల‌గొట్టే మరొక‌డొస్తున్నాడు!

కోలీవుడ్ లో త‌ళా అజిత్ క్రేజ్ గురించి చెప్పాల్సిన ప‌నిలేదు. ప్ర‌తీ సంక్రాంతికి అభిమానుల‌కి బ్లాక్ బ‌స్ట‌ర్ ట్రీట్ ఇవ్వ‌డం ఓ అన‌వాయితీగా వ‌స్తోంది. తాజాగా 2022 సంక్రాంతికి మ‌రో ట్రీట్ ఇవ్వ‌డానికి ది గ్రేట్ త‌ళా రెడీ అవుతున్నారు. అజిత్ క‌థానాయ‌కుడిగా న‌టిస్తోన్న `వాలిమై` జ‌న‌వ‌రి 13న సంక్రాంతి కానుక‌గా ప్రేక్ష‌కుల ముందుకు రాబోతుంది. ఇప్ప‌టికే రిలీజ్ అయిన ప్ర‌చార చిత్రాలు సినిమాపై అంచ‌నాల్ని అంత‌కంత‌కు పెంచేసాయి. అజిత్ మ‌రోసారి యాక్ష‌న్ కంటెంట్ తో ప్రేక్ష‌కుల ముందుకు రావ‌డం విశేషం. `వివేగం` త‌ర్వాత మ‌ళ్లీ ఆ స్థాయి హాలీవుడ్ విజువ‌ల్స్ సినిమాలో క‌నిపిస్తున్నాయి.

యాక్ష‌న్ థ్రిల్ల‌ర్ అంశాలు ఓ రేంజ్ లో ఓ హైలైట్ అవుతున్నాయి. ఈ నేప‌థ్యంలో `వాలిమై`కి పాన్ ఇండియా అప్పీల్ తీసుకొచ్చే ప్ర‌య‌త్నాలు జోరుగా సాగుతున్నాయి. త‌మిళ్ తో పాటు..తెలుగు..హిందీ భాష‌ల్లోనూ ఒకేసారి రిలీజ్ చేయాల‌ని యూనిట్ డైసైడ్ అయింది. తెలుగులోనూ అజిత్ సినిమాల‌కు మంచి క్రేజ్ ఉంది. ఆయ‌న‌కంటూ ప్ర‌త్యేక‌మైన అభిమానులు ఉన్నారు. ఈ నేప‌థ్యంలో ఇక్క‌డ పెద్ద స్కేల్ లో సినిమా రిలీజ్ కి స‌న్నాహాలు చేస్తున్న‌ట్లు స‌మాచారం. నేరుగా కోలీవుడ్ నిర్మాణ సంస్థ బే వ్యూ ప్రాజెక్ట్స్..జీ స్టూడియోస్ ఇక్క‌డ రిలీజ్ చేయాల‌ని ప్లాన్ చేస్తున్నారుట‌. ఇందులో తెలుగు హీరో కార్తికేయ గుమ్మ‌డి కొండ విల‌న్ గా న‌టించ‌డం విశేషం. అత‌డి యాడింగ్ సినిమాకు అద‌న‌పు బ‌లంగా చెప్పొచ్చు.

బాలీవుడ్ హీరోయిన్ హ్యూమా ఖురేషీ న‌టించింది. ఆ ర‌కంగా హిందీలోనూ సినిమాకి హ్యూమా ఎంట్రీ కలిసొచ్చే అవ‌కాశం క‌నిపిస్తుంది. ఈ చిత్రానికి `ఖాకీ` ద‌ర్శ‌కుడు హెచ్. వినోద్ ద‌ర్శ‌క‌త్వం వ‌హించారు. తొలి సినిమాతోనే వినోథ్ కి యాక్ష‌న్ చిత్రాల ద‌ర్శ‌కుడిగా మంచి పేరొచ్చింది. యాక్ష‌న్ థ్రిల్ల‌ర్ అంశాల్ని న‌రాలు తెగేంత ఉత్కంఠ‌గా ఎలివేట్ చేయ‌డం వినోథ్ ప్ర‌త్యేక‌త‌. `వాలిమై` లోనూ ఇలాంటి స‌న్నివేశాలు పీక్స్ లో ఉంటాయ‌ని స‌మాచారం. ఈ చిత్రంలో అజిత్ కాప్ పాత్ర‌లో క‌నిపిస్తారు. స్పోర్ట్స్ నేప‌థ్యం మ‌రో హైలైట్ అని టాక్ ఉంది.