చరణ్ ను లైన్లో పెడుతున్న వంశీ పైడిపల్లి?

'వినయ విధేయ రామ' తరువాత హీరోగా 'ఆర్ ఆర్ ఆర్' వంటి భారీ ప్రాజెక్టును ఒప్పుకోవడం, నిర్మాతగానూ 'సైరా' .. 'ఆచార్య' వంటి భారీ ప్రాజెక్టులను పట్టాలెక్కించడం వలన, అభిమానులకు .. చరణ్ కు మధ్య గ్యాప్ వచ్చేసింది. చరణ్ సినిమా థియేటర్ కి రాక చాలా కాలమైపోయిందనే అసంతృప్తితో వాళ్లు ఉన్నారు. అయితే ఆలస్యమైనా 'ఆర్ ఆర్ ఆర్' వంటి భారీ సినిమాతో ప్రేక్షకుల ముందుకు రాబోతున్నాననే ఉత్సాహంతో చరణ్ ఉన్నాడు. అంతేకాదు 'ఆచార్య' సినిమాలోను ఒక ముఖ్యమైన పాత్రలో కనిపించనున్నాడు.


ఈ రెండు సినిమాల తరువాత చరణ్ ఏ దర్శకుడితో చేయనున్నాడనేది అభిమానుల్లో ఆసక్తిని రేకెత్తిస్తోంది. నిజానికి చరణ్ తనకి 'రంగస్థలం' వంటి భారీ హిట్ ఇచ్చిన సుకుమార్ తో మరో సినిమా చేయాలని అనుకున్నాడు. 'పుష్ప' తరువాత ఈ ఇద్దరూ కలిసి సెట్స్ పైకి వెళదామని అనుకున్నారు. కానీ లాక్ డౌన్ కారణంగా సుకుమార్ 'పుష్ప' ప్రాజెక్టుపైనే ఉండిపోవలసి వచ్చింది. దాంతో చరణ్ .. తనకి ఎంతో సన్నిహితుడైన సురేందర్ రెడ్డితో కలిసి ఒక సినిమా చేయాలనుకున్నాడు. గతంలో 'ధ్రువ' సినిమాతో తనని కొత్తగా చూపించిన సురేందర్ రెడ్డితో చేయాలని నిర్ణయించుకున్నాడు.


సురేందర్ రెడ్డి కూడా చరణ్ కోసం ఒక విభిన్నమైన కథను రెడీ చేసే ఉంచాడు. కానీ చరణ్ ప్రస్తుతం తను చేస్తున్న ప్రాజెక్టుల నుంచి పూర్తిగా బయటపడటానికి మరికొంత కాలం పడుతుంది. అందువలన అఖిల్ సినిమా చేయడానికి సురేందర్ రెడ్డి రంగంలోకి దిగాడు. ఇక 'మహర్షి' తరువాత మహేశ్ తోనే మరో సినిమా చేయాలనుకున్న వంశీ పైడిపల్లి ప్రయత్నాలు ఫలించలేదు. ఇప్పట్లో మహేశ్ బాబు ఖాళీ అయ్యే అవకాశాలు కూడా కనిపించడం లేదు. అందువలన చరణ్ ను లైన్లో పెట్టడానికి వంశీ పైడిపల్లి ట్రై చేస్తున్నాడని అంటున్నారు. గతంలో ఈ ఇద్దరి కాంబినేషన్లో 'ఎవడు' వంటి హిట్ మూవీ వచ్చిన సంగతి తెలిసిందే. మరి వంశీ పైడిపల్లి ప్రయత్నాలు ఎంతవరకూ ఫలిస్తాయో చూడాలి.