స్టార్ డైరెక్టర్ వెబ్ సిరీస్ తో మళ్ళీ ఫామ్ లోకి వస్తాడా..?

యంగ్ రెబల్ స్టార్ ప్రభాస్ హీరోగా నటించిన 'మున్నా' సినిమాతో ఇండస్ట్రీకి పరిచయమయ్యాడు దర్శకుడు వంశీ పైడిపల్లి. ఆ తర్వాత ఎన్టీఆర్ తో 'బృందావనం'.. రామ్ చరణ్ తో 'ఎవడు'.. కింగ్ నాగార్జున - కార్తీ లతో 'ఊపిరి'.. సూపర్ స్టార్ మహేష్ బాబుతో 'మహర్షి' చిత్రాలను తెరకెక్కించాడు వంశీ పైడిపల్లి. స్లో అండ్ స్టడీగా వెళ్తున్న వంశీ పైడిపల్లి.. 13 ఏళ్ళ సినీ కెరీర్ లో కేవలం 5 సినిమాలు మాత్రమే తెరకెక్కించాడు. అయితే 'మహర్షి' వంటి సూపర్ హిట్ తర్వాత కూడా వంశీ.. తదుపరి సినిమాపై క్లారిటీ రాలేదు. కాకపోతే ప్రస్తుతం ఓ వెబ్ సిరీస్ ని రూపొందించే పనిలో ఉన్నాడని సమాచారం.

నిజానికి మహేష్ బాబు సిల్వర్ జూబ్లీ మూవీ 'మహర్షి' సక్సెస్ అయిన నేపథ్యంలో నెక్స్ట్ సినిమా కూడా వంశీ పైడిపల్లి దర్శకత్వంలో ఉంటుందని వార్తలు వచ్చాయి. దీని కోసం వంశీ చాలా రోజులు స్క్రిప్ట్ వర్క్ కూడా చేశారు. కానీ ఈ ప్రాజెక్ట్ వర్క్ ఔట్ కాలేదు. అదే సమయంలో మహేష్ బాబు పరశురామ్ డైరెక్షన్ లో 'సర్కారు వారి పాట' సినిమా అనౌన్స్ చేసాడు. దీని తర్వాత రాజమౌళి దర్శకత్వంలో ఓ సినిమా చేయనున్నారు. దీంతో మహేష్ - వంశీ పైడిపల్లి కాంబోలో ఇప్పట్లో సినిమా ఉండకపోవచ్చనే అంచనాలకు వచ్చేశారు.ఇక చేసేదేమీ లేక వంశీ వెబ్ వరల్డ్ లో అడుగుపెట్టాలని నిర్ణయించుకున్నాడు. తెలుగు ఓటీటీ 'ఆహా' కోసం వర్క్ చేస్తున్నాడు. అలానే ఓ వెబ్ సిరీస్ చేయడానికి సన్నాహాలు జరుగుతున్నాయి. బాలీవుడ్ లో ఉన్న పెద్ద డైరెక్ట‌ర్లు కూడా వెబ్ సిరీస్ ల‌తో మ‌ళ్లీ ఫామ్ లోకి వ‌చ్చిన‌వారే. మ‌రి ఇప్పుడు వంశీ కూడా 'ఆహా'కు తీయ‌బోయే సిరీస్ తో ఫామ్ లోకి వ‌చ్చి.. మళ్ళీ ఎవరైనా పెద్ద హీరోతో సినిమా చేస్తాడేమో చూడాలి.