రౌడీగారి సినిమాకు హీరోయిన్ ఫిక్స్

టాలీవుడ్ సెన్సేషన్ విజయ్ దేవరకొండ హీరోగా బిజీగా ఉండడం మాత్రమే కాకుండా చిత్ర నిర్మాణం లోకి అడుగుపెడుతున్న సంగతి తెలిసిందే. కింగ్ ఆఫ్ ది హిల్ అనే బ్యానర్ స్థాపించిన విజయ్ తన మొదటి ప్రయత్నంగా నిర్మిస్తున్న సినిమాతో తరుణ్ భాస్కర్('పెళ్ళి చూపులు' దర్శకుడు) ను హీరోగా పరిచయం చేస్తున్నాడు. తాజాగా ఈ సినిమాగురించి మరో ఇంట్రెస్టింగ్ అప్డేట్ బయటకు వచ్చింది.

ఈ సినిమాలో తరుణ్ భాస్కర్ కు జోడీగా తమిళ నటి వాణి భోజన్ ను ఫైనలైజ్ చేశారు. తమిళంలో దేవమగళ్ అనే పాపులర్ డైలీ సీరియల్ లో నటించిన వాణి తమిళ ప్రేక్షకుల్లో భారీ గుర్తింపు సంపాదించింది. ఆ సీరియల్ ద్వారా వచ్చిన గుర్తింపే ఇప్పుడు హీరోయిన్ ఆఫర్ తీసుకొచ్చింది. ఈ సినిమాకు చెన్నై బేస్డ్ షార్ట్ ఫిలిం మేకర్ సమీర్ దర్శకత్వం వహిస్తున్నాడు. దర్శకుడి గా పరిచయం అవుతున్న సమీర్ ఈ స్క్రిప్ట్ ను యూత్ ఫుల్ ఎంటర్టైనర్ గా తీర్చి దిద్దాడట.

విజయ్ దేవరకొండ కొత్త దర్శకులతో ఎప్పుడు పని చేసినా మంచి ఫలితాలు సాధించాడు. ఇప్పుడు కొత్త దర్శకుడు సమీర్ కు అవకాశం ఇచ్చాడంటే స్క్రిప్ట్ లో విషయం ఉండే ఉంటుంది. మరోవైపు తనకు 'పెళ్ళిచూపులు' సినిమాతో ఫస్ట్ సోలో హిట్ ఇచ్చిన దర్శకుడు తరుణ్ భాస్కర్ కు హీరోగా విజయ్ బ్రేక్ ఇస్తాడేమో వేచి చూడాలి.