విసుగెత్తిన మొగుళ్ళుగా వరుణ్ వెంకీ!

ఇటీవలే ప్రారంభోత్సవం చేసుకున్న ఎఫ్2(ఫన్ అండ్ ఫ్రస్ట్రేషన్) షూటింగ్ మాంచి స్వింగ్ లో ఉంది. దిల్ రాజు నిర్మాణంలో అనిల్ రావిపూడి దర్శకత్వంలో వెంకటేష్ వరుణ్ తేజ్ కాంబోలో మల్టీ స్టారర్ గా రూపొందుతున్న ఈ మూవీపై విక్టరీ అండ్ మెగా ఫ్యాన్స్ చాలా అంచనాలు పెట్టేసుకున్నారు. గురు తర్వాత బాగా గ్యాప్ తీసుకుని వెంకీ చేస్తున్న మూవీ ఇది. పవన్ కళ్యాణ్ తర్వాత మరో మెగా హీరోతో కలిసి నటించడం కూడా దీంతోనే జరుగుతోంది. మరోవైపు ఫిదా-తొలిప్రేమ వరస సక్సెస్ లతో జోరుమీదున్న వరుణ్ తేజ్ దీంతో హ్యాట్రిక్ కొట్టాలని మహా ఉత్సాహంగా ఉన్నాడు. ఇక ఎఫ్2 అనే టైటిల్ ద్వారా ఇది ఏ జానర్ అనే సూచన అయితే ఇచ్చారు కానీ ఈ హీరోల పాత్రలు ఏంటా అనే క్లారిటీ మాత్రం ఇప్పటి దాకా రాలేదు. దానికి సంబంధించిన అప్ డేట్ ఆసక్తి రేపుతోంది.

విశ్వసనీయ సమాచారం మేరకు ఇందులో వెంకటేష్ వరుణ్ తేజ్ ఇద్దరు తమ భార్యల వల్ల విసుగెత్తిపోయి వినోదం కోసం దూరంగా వెళ్ళిపోయి ఎంజాయ్ చేయాలనుకునే పాత్రలో వీళ్ళు చేసే అల్లరి ఓ రేంజ్ లో ఉంటుందట. హైదరాబాద్ లో ఒక మామూలు మధ్య తరగతి సెటప్ లా అనిపించే మధ్య తరగతి యువకుల్లా ఈ పాత్రలు అనిల్ రావిపూడి తీర్చిదిద్దినట్టు సమాచారం. భార్యలను వదిలి వెళ్ళాక వాళ్ళు కూడా వెనుకనే రావడం ఒకరికి తెలియకుండా ఒకరు నిఘా పెట్టడం ఇలా సరదా సరదాగా సాగిపోతున్నట్టు తెలిసింది. వెంకీకి జోడిగా తమన్నా వరుణ్ కు జంటగా మెహ్రీన్ నటిస్తున్న ఈ మూవీకి దేవి శ్రీ ప్రసాద్ సంగీతం ప్రత్యేక ఆకర్షణ. వచ్చే సంక్రాంతికి ప్లాన్ చేసిన ఈ మూవీ రిలీజ్ ఇంకా ఖరారు కావాల్సి ఉంది.