రెడీ అవుతున్న అంతరిక్షం

ఫిదా-తొలిప్రేమ వరస సక్సెస్ లతో జోష్ మీదున్న వరుణ్ తేజ్ కొత్త సినిమా అంతరిక్షం 9000 KMPH షూటింగ్ లాంఛనంగా పూర్తి చేసుకుంది. ఘాజీ ఎటాక్ తో దేశవ్యాప్తంగా గుర్తింపు సాధించడమే కాక మొదటి సినిమాకే జాతీయ అవార్డు వచ్చేలా చేసిన దర్శకుడు సంకల్ప్ రెడ్డి తీస్తున్న మూవీ కావడంతో దీని మీద ఇప్పటికే మంచి బజ్ నెలకొంది. గతంలో విడుదల చేసిన ఫస్ట్ లుక్ పోస్టర్ కు మంచి స్పందన దక్కింది. సికింద్రాబాద్ లోని ప్యారడైజ్ లో చివరి షెడ్యూల్ పూర్తి చేసుకున్న అంతరిక్షం అధిక శాతం అన్నపూర్ణ స్టూడియోస్ లో ప్రత్యేకంగా వేసిన సెట్ లోనే మేజర్ పార్ట్ షూటింగ్ జరుపుకుంది. రామేశ్వరంలో కూడా ఒక కీలక షెడ్యూల్ చేసారు.

టాలీవుడ్ లో మొదటి స్పేస్ థ్రిల్లర్ గా రూపొందుతున్న అంతరిక్షం బ్యాక్ డ్రాప్ పరంగా కూడా చాలా వినూత్నంగా కనిపిస్తోంది. సాధారణంగా ఇంగ్లీష్ సినిమాల్లో మాత్రమే కనిపించే ఇలాంటి నేపధ్యాలు తెలుగు సినిమాల్లోకి తీసుకురావడం అంటే మంచి పరిణామమే. ఇంకా విడుదల తేదీ ఫిక్స్ చేయని అంతరిక్షం డిసెంబర్ లో వచ్చే అవకాశాలు ఉన్నాయి. మూడు లేదా చివరి వారంలో తీసుకురావడం గురించి నిర్మాతలు నిర్ణయం తీసుకోవాల్సి ఉంది. చెలియా-పద్మావత్ తో పాటు సమ్మోహనం-నవాబ్ లాంటి సినిమాలతో విభిన్నమైన పాత్రలతో మెప్పించిన అదితి రావు హైదరి తో పాటు లావణ్య త్రిపాఠి హీరోయిన్ గా నటిస్తున్న ఈ మూవీ థ్రిల్లర్ గా రూపొందుతున్నట్టు సమాచారం.

పోస్ట్ ప్రొడక్షన్ వర్క్ ఇప్పటికే మొదలైపోయింది. గత రెండు సినిమాలు ప్రేమ కథలే కావడంతో వరుణ్ తేజ్ దీని మీద చాలా ఆసక్తిగా ఉన్నాడు. వరుణ్ తేజ్ మరో సినిమా వెంకటేష్ తో నటించిన ఎఫ్2 సంక్రాంతికి రావడం పక్కా కనక డిసెంబర్ లోవచ్చే అవకాశాలు ఎక్కువగా ఉన్నాయి. అదే జరిగితే రెండు నెలల్లో జంట సినిమాలతో పలకరించిన మెగా హీరో అవుతాడు. ఈ మధ్య కాలంలో ఎవరూ ఈ ఫీట్ చేయలేదు మరి.