శభాష్ మెగా కుర్రాడా..?

అక్కినేని అఖిల్ ను హీరోగా అరంగేట్రం చేయించే బాధ్యతను నాగార్జున ఏరికోరి వి.వి.వినాయక్ కే ఎందుకప్పగించాడు? తన పెద్ద కొడుకు నాగచైతన్య విషయంలో ఎదురైన చేదు అనుభవం వల్లే. జోష్ లాంటి క్లాస్ సినిమాతో అరంగేట్రం చేయడం వల్ల చైతూ ఇప్పటికే మాస్ ఇమేజ్ తెచ్చుకోలేక ఇబ్బంది పడుతున్నాడు. ఇప్పటికే చైతూ మార్కెట్ 15 కోట్లకు మించలేకపోవడానికి అతడి మాస్ ఇమేజ్ లేకపోవడమే కారణం. అందుకే ఏ కొత్త కథానాయకుడిని అరంగేట్రం చేయించాలన్నా మాస్ కథల కోసమే చూస్తారు టాలీవుడ్ లో. ఐతే వరుణ్ తేజ్ మాత్రం చాలా భిన్నమైన దారిని ఎంచుకున్నాడు. ‘ముకుంద’ లాంటి క్లాస్ సినిమాతో అరంగేట్రం చేశాడు. ఐతే రెండో సినిమాకు కూడా అతను రూటు మార్చలేదు.

క్రిష్ లాంటి క్లాస్ డైరెక్టర్ తో సినిమా ఒప్పుకున్నాడు. ఐతే క్రిష్ భిన్నమైన సినిమాలు తీసేవాడే కానీ.. వరుణ్ తో మరీ రిస్కీ ప్రాజెక్టు చేస్తాడని ఎవరూ ఊహించలేదు. కానీ ‘కంచె’ ట్రైలర్ చూస్తే జనాలకు మతిపోయింది. అసలు తెలుగులో ఇలాంటి కథాంశంతో సినిమా అన్నదే ఊహకందని విషయం. పైగా ఒక సినిమా వయసున్న హీరోతో ఇలాంటి సినిమా అస్సలు ఊహించలేం. క్రిష్ ఆలోచనలు ఎలాగైనా ఉండొచ్చు కానీ.. అతనడగ్గానే ఈ సినిమా ఒప్పుకున్నందుకు మాత్రం వరుణ్ తేజ్, నాగబాబును మెచ్చుకుని తీరాలి. టాలీవుడ్ లో ఈ మధ్య మంచి మార్పులొస్తున్నాయి. మహేష్ లాంటి హీరో ‘శ్రీమంతుడు’ లాంటి ఉదాత్తమైన సినిమా చేయడం అందుకు నిదర్శనం. ఇప్పుడు వరుణ్ తేజ్ లాంటి యంగ్ హీరో ఓ విభిన్నమైన, రిస్క్ ఉన్న సబ్జెక్ట్ తో సినిమా చేశాడు. ఈ సాహసం మిగతా హీరోల్ని సైతం ఇప్పటికే ఆలోచింపజేసి ఉంటుంది. సినిమా బాగుంటే ఇలాంటి ప్రయత్నాలు మరిన్ని జరిగేందుకు అవకాశముంటుంది.