లోఫ‌ర్ ట్రైల‌ర్‌ కి 10 ల‌క్ష‌ల క్లిక్‌లు

మెగా బ్ర‌ద‌ర్ నాగ‌బాబు త‌న‌యుడు వ‌రుణ్‌ తేజ్ సెల‌క్టివ్‌ గా క‌థ‌ల్ని ఎంచుకుంటూ ముందుకు సాగుతున్నాడు. ముకుంద - కంచె సినిమాల‌తో న‌టుడిగా త‌న‌ని తాను ప్రూవ్ చేసుకున్నాడు. రేసులో నేను కూడా ఉన్నా అంటూ సిగ్న‌ల్ ఇచ్చాడు. అయితే ఇవి రెండూ క్లాస్ మూవీస్‌. ఇప్పుడు ఆ బ్యారియ‌ర్‌ ని తెంచేసేందుకు పూర్తిగా మాస్ మ‌సాలా యాక్ష‌న్ సినిమాతో తెలుగు ప్రేక్ష‌కుల ముందుకు వ‌స్తున్నాడు.

ఈసారి పూరి జ‌గ‌న్నాథ్ ద‌ర్శ‌క‌త్వంలో లోఫ‌ర్ చిత్రంలో క‌థానాయ‌కుడిగా న‌టించాడు. ఇది కెరీర్ మూడో సినిమా. మాస్‌ ని మొద‌టిసారి ట‌చ్ చేయ‌బోతున్నాడు. ఇప్ప‌టికే లోఫ‌ర్ టీజ‌ర్‌ కి చ‌క్క‌ని స్పంద‌న వ‌చ్చింది. యూట్యూబ్‌ లో రిలీజైన లోఫ‌ర్ ట్రైల‌ర్‌ కి ఇప్ప‌టికే 10 ల‌క్ష‌ల క్లిక్కులు వ‌చ్చాయి. ఈ స్థాయిలో టీజ‌ర్‌ కి ఆద‌ర‌ణ ద‌క్కినందుకు పూరి జ‌గ‌న్నాథ్ అండ్ టీమ్ ప్రేక్ష‌కాభిమానుల‌కు కృత‌జ్ఞ‌త‌లు చెప్పారు. సి.కె.ఎంట‌ర్‌ టైన్‌ మెంట్స్ ప‌తాకంపై సి.క‌ళ్యాణ్ ఈ చిత్రాన్ని నిర్మిస్తున్నారు. వరుణ్‌ కెరీర్‌ కి ఇది ఎంతో కీల‌క‌మైన‌ది. అందుకే పూరి మ‌ద‌ర్ సెంటిమెంట్‌ కి దొంగ అనే కాన్‌ ఫ్లిక్టును జత చేసి తెలివైన స్ర్కిప్టుని రాసుకున్నాడు. ఈ మూవీ ఇటీవ‌లి కాలంలో రిలీజైన టెంప‌ర్ రేంజులో డిస్క‌ష‌న్ పాయింట్ అవ్వ‌డం ఖాయం అని చెప్పుకుంటున్నారు.

పూరి మేకింగ్‌ లో వ‌రుణ్ కొత్త‌గా క‌నిపిస్తాడ‌న్న అంచ‌నాలు అభిమానుల్లో ఉన్నాయి. ఆ అంచ‌నాలు నిజ‌మైతే వ‌రుణ్‌ తేజ్ మ‌రో మెట్టు ఎక్కిన‌ట్టే. వెయిట్ అండ్ సీ.