బాబీ సింహా త్రిభాషా చిత్రం 'వసంత కోకిల' టీజర్..!

నేషనల్ అవార్డ్ విన్నింగ్ యాక్టర్ బాబీ సింహా హీరోగా నటిస్తున్న త్రిభాషా చిత్రం ''వసంత కోకిల''. డెబ్యూ డైరెక్టర్ రమణన్ పురుషోత్తమ తెరకెక్కిస్తున్న ఈ చిత్రంలో 'నర్తనశాల' ఫేమ్ కాశ్మీర పర్దేశి హీరోయిన్ గా నటిస్తోంది. ఇప్పటికే ఈ చిత్రం నుంచి విడుదలైన ప్రచార చిత్రాలు - 'లోకాలే విడిచి' పాట మంచి స్పందన తెచ్చుకున్నాయి. ఈ క్రమంలో తాజాగా సినిమాకు సంబంధించిన టీజర్ ను చిత్ర బృందం రిలీజ్ చేసింది.

ఓ సముద్రంలో అపస్మారకస్థితిలో తేలియాడుతున్న బాబీ సింహా ను చూపించడంతో టీజర్ ప్రారంభమైంది. అదే సమయంలో అక్కడకు ఈదుకుంటూ వచ్చిన హీరోయిన్ అతనికి ముద్దుపెట్టడంతో కళ్ళు తెరుస్తాడు. అక్కడి నుంచి 'వసంత కోకిల' టీజర్ ఆద్యంతం ఉత్కంఠ భరితంగా సాగింది. ఇందులో ట్రాప్ - స్ట్రేంజ్ - మిస్టీరియస్ - పెయిన్ - కన్ఫ్యూజన్ వంటి అంశాలను ప్రస్తావించారు. చివర్లో ఓ ముసుగు వ్యక్తి సింహా పై అటాక్ చేయడంతో ఈ యాక్షన్ థ్రిల్లర్ టీజర్ ఎండ్ అయింది.

'వసంత కోకిల' టీజర్ చూస్తుంటే బాబీ సింహా మరో వైవిధ్యమైన సినిమాతో రాబోతున్నట్లు తెలుస్తోంది. నిర్మాతలు హై టెక్నికల్ వాల్యూస్ తో రిచ్ గా సినిమాని రూపొందిస్తున్నట్లు అర్థం అవుతోంది. దీనికి 'ప్రేమమ్' ఫేమ్ రాజేష్ మురుగేసన్ అందించిన నేపథ్య సంగీతం.. సినిమాటోగ్రాఫర్ గోపీ అమర్నాథ్ విజువల్స్ అద్భుతంగా ఉన్నాయి. దీనికి వివేక్ హర్షన్ ఎడిటింగ్ వర్క్ చేశారు.

రామ్ తాళ్లూరి సమర్పణలో ఎస్.ఆర్‌.టి. ఎంటర్టైన్మెంట్స్ మరియు ముద్రాస్ ఫిల్మ్ ఫ్యాక్టరీ బ్యానర్స్ పై ''వసంత కోకిల'' సినిమా తెరకెక్కుతోంది. రజినీ తాళ్లూరి - రేష్మీ సింహా నిర్మాతలుగా వ్యవహరిస్తున్నారు. భారీ బడ్జెట్ తో రూపొందిస్తున్న ఈ చిత్రాన్ని తెలుగు తమిళ కన్నడ భాషల్లో త్వరలోనే ప్రేక్షకుల ముందుకు తీసుకురానున్నారు.