ఆ హీరో తెలుగోళ్లపై ఆవేశం చూపిస్తాడట

తమిళనాట విపరీతమైన ఫ్యాన్ ఫాలోయింగ్ ఉన్న కథానాయకుడు అజిత్. అతడి సినిమా వస్తోందంటే తమిళనాట హంగామా మామూలుగా ఉండదు. బాక్సాఫీస్ షేక్ అయిపోతుంది. కొన్నేళ్లుగా వరుస హిట్లతో దూసుకుపోతూ.. సినిమా సినిమాకు తన రేంజ్ పెంచుకుంటన్నాడు అజిత్. ఈ ఏడాది ఆరంభంలో వచ్చిన ‘యెన్నై అరిందాల్’ సూపర్ హిట్టయింది. ఇప్పుడు ‘వేదాలం’ అనే సినిమాతో ఈ దీపావళికి తమిళ ప్రేక్షకుల్ని పలకరించబోతున్నాడు అజిత్. మన గోపీచంద్ తో శౌర్యం - శంఖం సినిమాలు తీసిన శివ ఈ సినిమాకు దర్శకుడు. అతను ఇప్పటికే అజిత్ తో ‘వీరం’ అనే సినిమా చేసి సూపర్ హిట్ కొట్టాడు. మళ్లీ వీళ్లిద్దరి కాంబినేషన్ అనగానే అంచనాలకు అమాంతం పెరిగిపోయాయి.

ఈ మధ్య ‘వేదాలం’ టీజర్ రిలీజ్ చేస్తే యూట్యూబ్ షేకైపోయింది. హిట్స్ - లైక్స్ విషయంలో సౌత్ ఇండియన్ రికార్డులన్నీ బద్దలైపోయాయి. ఈ సినిమాను తెలుగులో కూడా విడుదల చేయబోతున్నారు. ‘ఆవేశం’ అనే టైటిల్ పెట్టారు తెలుగు వెర్షన్ కి. ఐతే దీపావళికి క్రౌడ్ బాగానే ఉంది తెలుగులో. అజిత్ సినిమా 10న విడుదల కాబోతుండగా.. ఆ తర్వాతి రెండు రోజుల్లో అఖిల్, చీకటి రాజ్యం విడుదలవుతాయి. అప్పటికి ‘త్రిపుర’ విడుదలై కూడా నాలుగు రోజులే అవుతుంది. మరి ‘ఆవేశం’ సినిమాకు థియేటర్లు దొరకడం కష్టమే. దీంతో ఇంతకుముందు అజిత్ సినిమాల్ని రిలీజ్ చేసినట్లే కొంచెం లేటుగా విడుదల చేస్తారేమో.