ఆ ఛాన్స్ హీరోయిన్ల‌కి మాత్ర‌మేనా డీఎస్పీ?

దేవిశ్రీప్ర‌సాద్ మ‌ల్టీ టాలెంటెడ్ ప‌ర్స‌న్‌ గా గుర్తింపు తెచ్చుకున్నాడు. చాలాకాలంగా సౌత్ ఇండియా ఫిల్మ్ ఇండ‌స్ట్రీని రాక్ చేస్తున్న ఆయ‌న‌లో ఎంత మంచి సంగీత ద‌ర్శ‌కుడు ఉన్నాడో - అంత మంచి గాయ‌కుడు కూడా ఉన్నాడు. ఆయ‌న‌కి పాట‌లు రాయ‌డం కూడా తెలుసు. త్వ‌ర‌లోనే క‌థానాయ‌కుడిగా కూడా తెర‌పై సంద‌డి చేస్తాడ‌ని ప్ర‌చారం సాగుతోంది. దేవిశ్రీప్ర‌సాద్ అంటే ఇవి మాత్ర‌మే కాదండోయ్‌, ఆయ‌న‌లో ఓ మంచి ఫొటోగ్రాఫ‌ర్ కూడా ఉన్నాడు. దేవి కెమెరా ప‌ట్టుకుంటే ప్రొఫెష‌న‌ల్స్ సైతం విస్తుపోవాల్సిందే. అంత మంచి ఫొటోల్ని తీస్తాడు. ఇదివ‌ర‌కు లావ‌ణ్య త్రిపాఠిని త‌న కెమెరాలో బంధించాడు. ఆ ఫొటో షూట్ చాలా పాపుల‌ర్ అయ్యింది. ఇటీవ‌ల మ‌రోసారి ఆయ‌న కెమెరా చేత‌ప‌ట్టాడు.

అయితే ఈసారి కూడా ఆయ‌న కెమెరా లెన్సు హీరోయిన్‌ పైనే ప‌డ‌టం గ‌మ‌నార్హం. ఇంత‌కీ దేవి లేటెస్ట్ ఫొటో షూట్ గాళ్ ఎవ‌రో తెలుసా? అంద‌మైన క‌థానాయిక... వేదిక‌. బాణంతోపాటు - తెలుగులో ప‌లు చిత్రాల్లో న‌టించిన వేదిక ప్ర‌స్తుతం త‌మిళ్‌ - మ‌ల‌యాళం చిత్రాల్లో న‌టిస్తూ బిజీగా గ‌డుపుతోంది. ఆమెతో దేవిశ్రీప్ర‌సాద్ ప్ర‌త్యేకంగా ఓ ఫొటోషూట్ చేశాడు. అందులో ఓ ఫొటోని ట్విట్ట‌ర్‌ లో పోస్ట్ చేసి దేవిశ్రీప్ర‌సాద్ తీసిన అంద‌మైన నా ఫొటో అంటూ సంతోష‌ప‌డిపోయింది. ఆ ఫొటోకి ఆన్‌ లైన్‌ లో మంచి రెస్పాన్స్ వ‌స్తోంది. అయితే ఇండ‌స్ట్రీ వ‌ర్గాలు మాత్రం దేవిశ్రీప్ర‌సాద్ హీరోయిన్ల‌నే ఫొటోలు తీస్తాడా? ఆ ఛాన్స్ హీరోల‌కి ఇవ్వ‌డా? అని మాట్లాడుకుంటున్నారు. మ‌రి దేవి ఏం చెబుతాడో?

Like Us on Facebook : https://www.facebook.com/Tupakidotcom/