ఆ విషయంలో 'వీరమల్లు' టీమ్ సక్సెస్ అయినట్లే..!

పవర్ స్టార్ పవన్ కళ్యాణ్ నటిస్తున్న లేటెస్ట్ మూవీ ''హరి హర వీరమల్లు''. ఇది పవన్ కెరీర్ లోనే అత్యధిక బడ్జెట్ తో తెరకెక్కుతున్న సినిమా. అందులోనూ ఆయన నటిస్తున్న మొట్టమొదటి పీరియాడిక్ యాక్షన్ అడ్వెంచర్ మూవీ కావడంతో అభిమానుల్లో అందరిలో నెలకొంది. అయితే ఈ సినిమా లేట్ అవుతూ ఉందటం అభిమానులను నిరాశకు గురి చేస్తోంది.

'హరి హర వీరమల్లు' చిత్రానికి క్రిష్ జాగర్లమూడి దర్శకత్వం వహిస్తున్నారు. 17వ శతాబ్దం నాటి మొఘలాయిలు - కుతుబ్ షాహీల కాలానికి సంబంధించిన చారిత్రక కథాంశంతో.. ఒక బందిపోటు వీరోచిత గాథగా ఈ సినిమాని తెరకెక్కిస్తున్నారు. దీని కోసం భారీగా సెట్ వర్క్ చేశారు. కానీ అనుకున్న విధంగా షూటింగ్ సజావుగా సాగలేదు.

అప్పుడెప్పుడో సెట్స్ మీదకు వెళ్లిన ఈ ప్రాజెక్ట్.. వివిధ కారణాలతో ఆలస్యమవుతూ వచ్చింది. ఇప్పటి వరకూ సగం సినిమా షూట్ పూర్తయింది. ఇదే విషయాన్ని మేకర్స్ ఎప్పటి నుంచో చెబుతున్నారు కానీ.. అక్కడి నుంచి ముందుకు వెళ్ళలేదు. సినిమా ప్రారంభమైనప్పుడు పోయిన ఏడాదే రిలీజ్ అవుతుందని అనుకున్నారు. మేకర్స్ మాత్రం 2022 సమ్మర్ లోనే రాబోతున్నట్లు ప్రకటించారు.

ఆ తర్వాత ఆ తేదీ వచ్చే ఏడాది సంక్రాంతికి మారింది. ఇప్పుడు 2023 వేసవిలో విడుదల అని ఇటీవల నిర్మాత ప్రకటించారు. కానీ షూటింగ్ లో విపరీతంగా జాప్యం జరుగుతుండటంతో అసలు ఈ సినిమా ఎప్పుడు రిలీజ్ అవుతుందో తెలియని పరిస్థితి ఏర్పడింది. దీంతో రోజురోజుకూ ఆసక్తి తగ్గుతూ వస్తోంది. ఇదిలా కొనసాగితే ఈ సినిమా గురించి అందరూ మర్చిపోయే పరిస్థితి వస్తుందేమో అనే కామెంట్స్ వచ్చాయి. ఇలాంటి టైంలో 'పవర్ గ్లాన్స్' వీడియోతో అందరి దృష్టిని ఆకర్షించే ప్రయత్నం చేశారు మేకర్స్.

ఇప్పటికే విడుదలైన 'హరి హర వీరమల్లు' ఫస్ట్ లుక్ & గ్లిమ్స్ కు పీకే ఫ్యాన్స్ నుంచి మంచి రెస్పాన్స్ వచ్చింది. ఈ క్రమంలో పవన్ కళ్యాణ్ పుట్టినరోజు స్పెషల్ గా శుక్రవారం ఓ చిన్న సర్ప్రైజింగ్ వీడియోతో వచ్చారు. తొడగొట్టాడో తెలుగోడు అంటూ వచ్చిన ఈ గ్లిమ్స్ లో పవన్ లుక్ - మేనరిజం పవర్ ఫుల్ గా ఉన్నాయి. మల్లయోధులతో తలపడుతున్న దృశ్యాలకు తగ్గట్టుగా ఎంఎం కీరవాణి అద్భుతమైన నేపథ్య సంగీతంతో రోమాలు నిక్కబొడుచుకునేలా చేసింది.

హరి హర వీరమల్లు పవర్ గ్లాన్స్ కు అభిమానుల నుంచి విశేష స్పందన లభించింది. పవన్ స్క్రీన్ మీద కనిపిస్తే చాలని అనుకుంటుంటే.. ఏకంగా తొడగొట్టి వారిని ఉత్సాహ పరిచారు. ఈ వీడియోకి యూట్యూబ్ లో 7 మిలియన్ల వరకూ వ్యూస్ వచ్చాయి. ఈ ప్రాజెక్ట్ మీద రకరకాల రూమర్స్ వస్తున్న నేపథ్యంలో పవన్ క్యారెక్టర్ ఇంట్రో వీడియోతో సందడి నెలకొనేలా చేయడంలో చిత్ర బృందం సఫలమైందని చెప్పాలి. అయితే ఇది సినిమా బిజినెస్ కు ఎంత వరకు హెల్ప్ అవుతుందో చూడాలి.

'వీరమల్లు' చిత్రాన్ని పాన్ ఇండియా స్థాయిలో తెలుగు తమిళ మలయాళ కన్నడ హిందీ భాషల్లో విడుదల చేయనున్నారు. ఇందులో పవన్ కళ్యాణ్ సరసన ఇస్మార్ట్ బ్యూటీ నిధి అగర్వాల్ హీరోయిన్ గా నటిస్తోంది. అర్జున్ రాంపాల్ - నర్గిస్ ఫక్రి - ఆదిత్య మీనన్ - పూజిత పొన్నాడ ఇతర పాత్రలు పోషిస్తున్నారు.

ఏఎమ్ రత్నం సమర్పణలో మెగా సూర్య ప్రొడక్షన్స్ బ్యానర్ పై ఎ. దయాకర్ రావు ఈ చిత్రాన్ని నిర్మిస్తున్నారు. జ్ఞాన‌శేఖ‌ర్ వి.ఎస్‌. సినిమాటోగ్రఫీ అందిస్తుండగా.. బుర్రా సాయిమాధవ్ సంభాషణలు రాస్తున్నారు. అన్నీ అనుకున్న జరిగి ఈ సినిమా వచ్చే ఏడాది సమ్మర్ నాటికి వస్తుందో లేదో వేచి చూడాలి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.