అంధగాడు రెండో మూవీకి రెడీ!!

టాలీవుడ్ లో నయా దర్శకుల ట్రెండ్ ఊపు మీదే ఉంది. కొత్త తరం సినిమాలను.. మేకింగ్ ను చూపించే దర్శకులకు ఆదరణ కూడా బాగానే లభిస్తోంది. ఏళ్లకు ఏళ్లు సానబెట్టిన స్క్రిప్ట్ ను తెరపైకి ఎక్కించే అవకాశం వచ్చినపుడు.. చక్కగా ఉపయోగించుకుంటున్నారు డైరెక్టర్స్. అయితే తొలి చిత్రంతో సక్సెస్ కొట్టినా.. రెండో చిత్రాన్ని కూడా విజయవంతం చేసి.. ద్వితీయ విఘ్నం దాటితేనే ఆయా దర్శకులకు క్రేజ్ నిలబడుతోంది.

రాజ్ తరుణ్ హీరోగా అంధగాడు మూవీని రూపొందించాడు వెలిగొండ శ్రీనివాస్. ఈ సినిమా భారీ సక్సెస్ సాధించలేకపోయినా.. నష్టాలను అయితే మిగల్చలేదు. దర్శకుడు కాన్సెప్ట్ ను కామెడీగా డీల్ చేసిన తీరు మాత్రం మెప్పించింది. ఇప్పుడీ డైరెక్టర్.. తన మరుసటి చిత్రాన్ని సిద్ధం చేసుకుంటున్నాడు. ఇప్పటికే స్క్రిప్ట్ దాదాపు ప్రిపేర్ అయిపోయిందంటున్న వెలిగొండ.. ప్రస్తుతం ఫైనల్ టచ్ ఇస్తున్నట్లు చెప్పాడు. రొమాంటిక్ కామెడీ జోనర్ లో ఉండే ఈ చిత్రానికి.. స్క్రీన్ ప్లే ప్రధాన ఆకర్షణగా నిలుస్తుందని చెబుతున్నాడు డైరెక్టర్.

ఎవరూ ఊహించని స్థాయిలో స్క్రీన్ ప్లే ఉంటుందని.. స్టోరీ రివీల్ అయ్యాక ప్రతీ ఒక్కరూ ఎంజాయ్ చేస్తారని నమ్మకంగా చెబుతున్నాడు. తన రెండో చిత్రాన్ని కూడా అనిల్ సుంకర నిర్మాణంలోనే రూపొందించబోతున్నట్లు వెలిగొండ శ్రీనివాస్ చెప్పాడు. తమ ఇద్దరి మధ్య బాండింగ్ బాగా కుదిరిందని.. మళ్లీ సక్సెస్ ను రిపీట్ చేయగలమనే కాన్ఫిడెన్స్ ఉందని అంటున్నాడు ఈ యంగ్ డైరెక్టర్.