తెరమీదకు క్రేజీ కాంబో..!

టాలీవుడ్ హీరో విక్టరీ వెంకటేష్ గతంలోకంటే ఇప్పుడు సినిమాలపరంగా స్పీడ్ పెంచేసాడు. ఇదివరకు వెంకీ నుండి ఏడాదికి ఒకే సినిమా విడుదల అవుతూ వచ్చాయి. కానీ ఈ ఏడాది ఏకంగా మూడు సినిమాలను రిలీజ్ లైన్ లో పెట్టేసాడు. ప్రస్తుతం వెంకీ చేతిలో తమిళ సూపర్ హిట్ 'అసురన్' మూవీ రీమేక్ నారప్పతో పాటు అనిల్ రావిపూడితో ఎఫ్3, మలయాళం సూపర్ హిట్ దృశ్యం-2 రీమేక్ సినిమాలు షూటింగ్ జరుపుకుంటున్నాయి. ఈ మూడు సినిమాలు కేవలం నాలుగు నెలల వ్యవధిలో విడుదల కాబోతున్నాయి. నిజానికి వెంకీ నటిస్తున్న నారప్ప, దృశ్యం-2 సినిమాలు రీమేక్స్ కాగా ఎఫ్3 ఒకటే నేరుగా తెలుగులో రెడీ అవుతోంది. అయితే ఊపులో ఊపు అన్నట్లుగా మరో కథకు పచ్చజెండా ఊపినట్లు తెలుస్తుంది.

ఇటీవలే క్లాస్ డైరెక్టర్ శేఖర్ కమ్ముల వెంకీకి ఓ కథ వినిపించడం జరిగిందట. ఆ కథ బాగా నచ్చడంతో వెంకీ వెంటనే గ్రీన్ సిగ్నల్ ఇచ్చాడని టాక్. త్వరలో వీరి కాంబినేషన్ పై క్లారిటీ రానుందట. అయితే ప్రస్తుతం శేఖర్ కమ్ముల 'లవ్ స్టోరీ' సినిమా విడుదల పనుల్లో బిజీగా ఉన్నాడు. నాగచైతన్య, సాయిపల్లవి జంటగా నటించిన ఈ సినిమా ఏప్రిల్ 16న విడుదల తేదీ ఖరారు అయింది. మరి ఆ సినిమా విడుదల కాగానే శేఖర్ కమ్ముల.. వెంకీ స్క్రిప్ట్ పై దృష్టి పెడతాడని సమాచారం. మరి శేఖర్ కమ్ములతో వెంకీ సినిమా అంటే ఇదొక డిఫరెంట్ కాంబినేషన్ అంటూ సోషల్ మీడియాలో అభిప్రాయాలు వ్యక్తం అవుతున్నాయి. ఇదిలా ఉండగా.. వెంకీ నటిస్తున్న నారప్ప సినిమా మే 14న విడుదల అవుతుండగా.. దృశ్యం-2 జులైలో, ఎఫ్3 మూవీ ఆగష్టు నెలలో విడుదల కాబోతున్నాయి. చూడాలి మరి వెంకీమామ ఈసారి ఎన్ని హిట్స్ ఖాతాలో వేసుకుంటాడో!